مسلم لیگ نون کی سیاست سے مطمئن نہیں ہوں، شاہد خاقان عباسی

اسلام ٹائمز۔ سابق وزیراعظم شاہد خاقان عباسی کا کہنا ہے کہ میں مسلم لیگ نون کی سیاست سے مطمئن نہیں ہوں، راستے کا تعین کریں، پھر الیکشن میں جائیں، ورنہ الیکشن انتشار کے علاوہ کچھ نہیں دے گا۔ ایک نجی ٹی وی کو انٹرویو دیتے ہوئے شاہد خاقان عباسی نے کہا کہ پارٹی کا عہدیدار نہیں ہوں، کسی مشاورت میں شامل نہیں ہوں، نواز شریف وزیراعظم بنے تو میں خود کو وزیر نہیں دیکھتا۔ رہنماء مسلم لیگ (ن) نے کہا کہ شہباز حکومت میں فیصلہ کرنے کی صلاحیت اور اسپیڈ نظر نہیں آئی، جو ہونی چاہیئے تھی۔

پچھلی حکومت نے بھی ساڑھے تین سال فیصلے نہیں کیے، آپ کر لیتے، آپ نے بھی نہیں کیے، قصور وار صرف شہباز شریف نہیں ہم سب ہیں۔ شاہد خاقان عباسی نے کہا کہ آج کی سیاست گالی گلوچ کی ہے، 2013ء سے 2018ء تک خرابیوں کی طویل داستان ہے، کوئی شبہ نہیں کہ 2018ء کا الیکشن چوری ہوا۔ رہنماء مسلم لیگ نون نے کہا کہ اب ہمیں اس سے سبق حاصل کرنا ہے، آگے کی طرف دیکھنا ہے، لوگ آج اسے مسئلہ نہیں سمجھتے، حالانکہ خرابی کی جڑ یہی چیزیں ہیں، خرابیاں درست نہیں کریں گے تو مسئلہ آگے نہیں چلے گا۔