نواز شریف عدالتوں کی مرضی سے گئے، عدالت کی مرضی سے واپس آئیں گے، خرم دستگیر

اُن کا مزید کہنا تھا کہ درست بات یہ ہے کہ نواز شریف 21 اکتوبر کو واپس آرہے ہیں، وہ عدالتوں کی اجازت سے گئے تھے، اُن کی ایک اپیل عدالت کے سامنے پینڈنگ ہے۔ وہ عدالت کے سامنے پیش ہو کر اپنی اپیل کی پیروی کا آغاز کریں گے۔ انہوں نے کہا کہ ایئرپورٹ سے عدالت تک کے معاملے پر ایک اور عدالت کے سامنے جاکر قانونی چارہ جوئی پر قانونی ٹیم مشاورت کررہی ہے۔ نون لیگی راہنما نے کہا کہ عوام کو یہ سمجھانا ہے کہ مہنگائی کے ذمہ دار وہ لوگ ہیں جو 2014ء سے سیاسی انجینئرنگ کرتے رہے۔ 2013ء میں حالات خراب تھے نوازشریف نے ملک کو بدترین حالات سے نکالا۔

سابق وفاقی وزیر کا یہ بھی کہنا تھا کہ آج بھی مشکل حالات سے نواز شریف یی ملک کو نکال سکتے ہیں۔ 16 ماہ کی حکومت کی کامیابیوں اور ناکامیوں کی ذمہ داری 15 جماعتوں پر ہے۔ خرم دستگیر نے کہا کہ 16 ماہ کی مسلم لیگ نون کی کارکردگی ڈوبی ہوئی کشتی کو نکالنے کی کہانی ہے۔ ہماری جماعت کو اکثریت ملی تو نیب کے معاملے پر عملدرآمد کریں گے۔ انہوں نے کہا کہ شاہد خاقان عباسی کو بتانا چاہیے تھا کہ کراچی میں آج امن ہے تو کریڈٹ نون لیگ کو جاتا ہے۔ نون لیگی راہنما نے کہا کہ آج جو دہشت گردی بڑھ رہی ہے عمران خان اور عارف علوی نے 2021ء میں طالبان کو عام معافی کی آفر کی تھی اور لاکر بسایا یہ اس کے مضمرات ہیں۔