آزاد کشمیر کے عوام کا پیسہ ہمارے پاس امانت ہے، انوار الحق

اسلام ٹائمز۔ وزیراعظم آزاد کشمیر چوہدری انوارلحق نے کہا ہے کہ آزاد کشمیر کے عوام کا پیسہ ہمارے پاس امانت ہے جو اصل حقدار تک پہنچانا ہم سب کی ذمہ داری ہے۔ پونچھ ڈویژن کے ترقیاتی منصوبوں کے فنڈز پونچھ میں ہی خرچ ہوں گے۔ آزاد کشمیر کے 33 حلقوں میں برابری کی بنیاد پر ترقیاتی فنڈز جاری کر رہے ہیں۔ ڈسٹرکٹ مانیٹرنگ کمیٹیاں بنا رہے ہیں جس میں بلدیاتی نمائندگی، میڈیا، سیاسی اور سول سوسائٹی کے نمائندے شامل ہوں گے، جو ہسپتال، سکول، بی ایچ یوز کے علاوہ بجلی کی چوری اور ترقیاتی منصوبوں کی مانیٹرنگ کریں گے۔ تعلیمی اداروں سمیت تمام اداروں میں بائیو میٹرک حاضری کو یقینی بنایا جائے۔ کام سے غفلت برتنے والوں کو کسی صورت معاف نہیں کریں گے۔ جاریہ ترقیاتی منصوبوں کی فوری تکمیل کو یقینی بنایا جائے، فنڈز کا کوئی مسئلہ نہیں ہونے دیں گے۔ ان خیالات کا اظہار وزیراعظم آزاد کشمیر چوہدری انوارلحق نے پونچھ ڈویژن کے دورہ کے دوران ڈویثرنل و ڈسٹرکٹ افسران کے ترقیاتی جائزہ اجلاس سے خطاب کرتے ہوئے کیا۔ اجلاس میں سابق صدر و وزیراعظم سردار محمد یعقوب خان، سینئر وزیر کرنل (ریٹائرڈ) وقار احمد نور، وزیر حکومت فہیم اختر ربانی، وزیر حکومت سردار عامر الطاف، ممبر قانون ساز اسمبلی حسن ابراہیم نے بھی شرکت کی۔

جائزہ اجلاس میں کمشنر پونچھ ڈویژن سردار سہیل اعظم، ڈی آئی جی پونچھ ریجن شہریار سکندر، ڈپٹی کمشنر پونچھ ممتاز کاظمی، چیف انجینئر شاہرات اور مختلف اعلی حکومتی افسران بھی موجود تھے، وزیراعظم نے پونچھ ڈویژن میں محکمہ شاہرات، محکمہ تعلیم، محکمہ فزیکل پلاننگ و ہاؤسنگ، محکمہ برقیات سمیت دیگر محکموں کی کارکردگی کا جائزہ لیا۔ ڈویژنل آفیسران نے وزیراعظم آزاد کشمیر کو اپنے اپنے محکموں کے حوالے سے بریفنگ دی. وزیراعظم نے کہا ہم نے 70 سال کا نظام بدلنا ہے اب جس کا بجٹ ہو گا اسی کو ملے گا جونیئر افسران کو بھی ڈی ڈی او بنا رہے ہیں۔ فنڈز تمام 33 حلقوں میں برابر دیے گئے، میرا سب حلقوں کے لیے فارمولا ایک ہی ہے۔ ہم سب کو برابر سہولیات دیں گے۔ محکمہ شاہرات کے افسران موقع پر جا کر پراجیکٹس کا کام چیک کریں اور سکیمیں بنائیں، دفتروں میں بیٹھ کر نہ بنائیں۔ پونچھ میں چاروں فیز مکمل کریں، پیسے میں اپ کو دوں گا۔ میں جو پیسے دے رہا ہوں اگر اس میں کوئی MLA پرانا پروجیکٹ جاری رکھنا چاہتا ہے تو کو اس کی اجازت دے رہا ہوں، وزیراعظم نے ہدایت کی کہ کسی چیف انجینئر کو آئندہ اکٹھا پیسہ جاری نہیں ہو گا صرف پراجیکٹ کے مطابق جاری ہو گا۔