اقوام متحدہ کے دفتر کے سامنے کشمیریوں کی ریلی

اسلام ٹائمز۔ امریکہ بھر سے کشمیریوں اور ان کے حامیوں نے اقوام متحدہ کی عمارت کے سامنے احتجاجی ریلی نکالی تاکہ عالمی ادارے پر زور دیا جائے کہ وہ جموں و کشمیر میں استصواب رائے کے اپنے وعدے کو پورا کرے تاکہ کشمیری حق خودارادیت کے استعمال کے ذریعے اپنے سیاسی مستقبل کا فیصلہ خود کر سکیں۔ ذرائع کے مطابق ریلی اس وقت نکالی گئی جب بھارت کے وزیر خارجہ ایس جے شنکر اقوام متحدہ کی جنرل اسمبلی سے خطاب کر رہے تھے۔ مظاہرین نے 5 اگست 2019ء کے بھارت کے غیر قانونی اقدامات کی مذمت کی جن کے تحت جموں و کشمیر کی خصوصی حیثیت کو ختم کر دیا گیا۔

مظاہرین نے بھارت کے خلاف نعرے لگائے اور انہوں نے ہاتھوں میں پلے کارڈز اٹھا رکھے تھے جن پر”بھارت اقوام متحدہ کی قراردادوں کا احترام کرو”، ”دہشت گرد کون ہے؟ مودی، مودی”، ”آزادی سب کے لیے، آزادی کشمیریوں کے لئے”، ”بھارتی فوج، کشمیر کو چھوڑ دو”، ”کشمیر سے فوج کو نکال دو”، ”بھارت اقوام متحدہ میں کئے گئے وعدوں کا احترام کرو”، ”جاگ جائو جاگ جائو اقوام متحدہ جاگ جائو”، ”ہم یاسین ملک کے لیے انصاف کا مطالبہ کرتے ہیں” اور ”بھارت تمام سیاسی قیدیوں کو رہا کرو” جیسے نعرے درج تھے۔ اس کے علاوہ واشنگٹن میں قائم خالصتان افیئر سینٹر کے سربراہ ڈاکٹر امرجیت سنگھ کی قیادت میں سکھوں کی ایک بڑی تعداد نے بھی ایک مظاہرہ کیا۔

کشمیریوں کی ریلی کے مقررین نے جموں و کشمیر میں آبادی کا تناسب تبدیل کرنے کی بھارتی حکومت کی کوششوں کی مذمت کی۔ انہوں نے محمد یاسین ملک سمیت کشمیری رہنمائوں کی رہائی کا بھی مطالبہ کیا۔ ورلڈ کشمیر اویئرنس فورم کے صدر ڈاکٹر غلام نبی میر نے ریلی سے خطاب کرتے ہوئے کہا کہ ہم ایک بار پھر دنیا کو یہ بتانے کے لیے اقوام متحدہ کے دفتر کے سامنے حاضر ہوئے ہیں کہ وہ گزشتہ 76سال سے کشمیریوں کے بنیادی حقوق کا تحفظ کرنے میں ناکام رہا ہے۔

آزاد کشمیر کے صدر بیرسٹر سلطان محمود چوہدری نے ویڈیو لنک کے ذریعے اجتماع سے خطاب کرتے ہوئے کہا کہ کشمیر کی سنگین صورتحال اقوام متحدہ کی سلامتی کونسل کی توجہ  کی متقاضی ہے۔ ورلڈ فورم فار پیس اینڈ جسٹس کے چیئرمین ڈاکٹر غلام نبی فائی نے عالمی ادارے سے اپیل کی کہ انسانی حقوق، کشمیریوں کے مفادات، بھارت اور پاکستان کے اہم مفادات کے تحفظ کے حوالے سے بنیادی اصول طے کیے جائیں اور ان پر عمل کیا جائے اور پھر ان مقاصد کی طرف قدم بڑھایا جائے جس کے نتیجے میں ایک ایسا حل سامنے آئے جو سب کے لیے جیت ہو۔ ریلی سے آزاد کشمیر سے رکن اسمبلی ڈاکٹر پیر علی رضا بخاری، آزاد کشمیر کے وزیراعظم کے سابق مشیر سردار سوار خان اور دیگر نے بھی خطاب کیا۔