پی ٹی آئی کے سابق رکن اسمبلی علی نواز اعوان استحکام پاکستان پارٹی میں شامل ہوگئے

اسلام ٹائمز۔ اسلام آباد سے پاکستان تحریک انصاف کے سابق رکن قومی اسمبلی علی نواز اعوان نے استحکام پاکستان پارٹی میں شمولیت اختیار کرلی۔لاہور میں علی نواز اعوان نے استحکامِ پاکستان پارٹی کے پیٹرن ان چیف جہانگیر ترین اور مرکزی صدر عبدالعلیم خان سے ملاقات کی۔ ملاقات میں قیادت پر مکمل اعتماد کا اظہار کرتے ہوئے پارٹی میں شمولیت کا اعلان کیا۔ اس کے علاوہ سابق صوبائی وزیر اور تحریک انصاف کے رہنماء سردار آصف نکئی بھی آئی پی پی میں شامل ہوگئے، سردار آصف نکئی نے جہانگیر ترین اور عبدالعلیم خان سے ملاقات میں شمولیت کا اعلان کیا۔

قبل ازیں پیپلزپارٹی کے سابق رہنماء مصطفیٰ نواز کھوکھر نے کہا تھا کہ کچھ دن پہلے خبر آئی کہ علی اعوان کو گرفتار کر لیا گیا ہے، علی اعوان کو نہ تو کسی عدالت میں پیش کیا گیا، نہ ہی اُن کے بارے میں کوئی معلومات ہیں۔ انہوں نے کہا تھا کہ جس حلقے سے علی نواز اعوان منتخب ہوئے تھے، اُس میں ویسے سپریم کورٹ اور ہائیکورٹ بھی موجود ہے، تعجب ہے کہ عین ناک کے نیچے سیاستدان غائب ہو رہے ہیں اور معزز عدلیہ خاموش ہے۔ خیال رہے کہ علی نواز اعوان 2018ء میں پاکستان تحریک انصاف کے ٹکٹ پر قومی اسمبلی کے حلقہ این اے 53 اسلام آباد سے رکن اسمبلی منتخب ہوئے تھے۔ وہ عمران خان کے دور حکومت میں ان کے معاون خصوصی بھی رہے ہیں