روپیہ تگڑا، ڈالر کے انٹربینک ریٹ 286 سے نیچے آگئے

اسلام ٹائمز۔ آئی ایم ایف بورڈ کی منظوری سے دسمبر کے ابتدائی 10 یوم میں 70 ملین ڈالر کی قسط ملنے اور مزید انفلوز آنے کی توقعات کے باعث پیر کو مسلسل تیسرے سیشن میں بھی ڈالر کی نسبت روپیہ تگڑا رہا، جس سے ڈالر کے انٹربینک ریٹ 286 روپے اور اوپن ریٹ 288 روپے سے بھی نیچے آگئے۔ آئی ایم ایف معاہدے کے اثرات، اپریل میں جاری پروگرام ختم ہونے کے بعد نئے قرض پروگرام میں شمولیت کی راہ ہموار ہونے جیسے عوامل روپے کو تگڑا کرنے کا باعث ہیں۔ پیر کو کاروبار کے اختتام پر انٹربینک مارکیٹ میں ڈالر کی قدر 53 پیسے کی کمی سے 285 روپے 96 پیسے پر بند ہوئی،  اسی طرح اوپن کرنسی مارکیٹ میں بھی ڈالر کی قدر 75 پیسے کی کمی سے 287 روپے 50 پیسے پر بند ہوئی۔

آئی ایم ایف کے ساتھ اسٹاف لیول کا معاہدہ طے ہونے کے نتیجے میں عالمی سرمایہ کاروں کی جانب سے پاکستان کے مختلف شعبوں میں سرمایہ کاری دلچسپی کی خبریں بھی ڈالر کی تنزلی کا سبب بنیں۔ ماہرین کا کہنا ہے کہ اسٹیٹ بینک کے اعلان کردہ پانچ سالہ اسٹریٹجک پلان کے تحت مہنگائی میں کمی، بینکوں کے مالیاتی نظام کو مضبوط بنانے اور معیشت میں تیز رفتار بہتری کے لیے ڈیجیٹل ٹیکنالوجی کا استعمال کرنے سے روپے کی قدر کو بالواسطہ طور پر تگڑا کرنے کا باعث بن سکے گا۔ دوست ممالک کی جانب سے پاکستان کو درپیش مالیاتی مشکلات سے نکالنے کی یقین دہانیوں سے بھی مارکیٹ میں سپلائی بہتر ہوگئی ہے اور محدود درآمدی طلب کے دباؤ کے باوجود ڈالر کی نسبت روپیہ تگڑا ہوتا نظر آرہا ہے۔