اسلام ٹائمز۔ جماعت اسلامی کے نائب امیر سینیٹر پروفیسر خورشید احمد نے یونیسکو کی طرف سے فلسطین کو مکمل رکن کے طور پر تسلیم کرنے پر امریکہ کی طرف سے یونیسکو کے فنڈز بند کرنے کی شدید مذمت کی ہے۔ انہوں نے کہا کہ اس نام نہاد سپر پاور نے دو ریاستوں کے قیام کے زبانی دعووں کے باوجود نہ صرف فلسطین کی مکمل طور پر رکنیت کی مخالفت کی ہے بلکہ آگے بڑھتے ہوئے فلسطین کے ریاست کے حق کو تسلیم کیے جانے پر یونیسکو کو سزا دے رہا ہے۔ جماعت اسلامی کے رہنما نے عرب اور دیگر مسلمان ممالک پر زور دیا کہ وہ یونیسکو کے ساتھ کھڑے ہو جائیں اور امریکہ کی طرف سے عدم ادائیگی کی وجہ سے یونیسکو کے 70ملین ڈالر کے نقصان کو پورا کریں۔