نیٹو سپلائی کی بندش کا 12 واں دن، اتحادی افواج کی مشکلات بڑھ گئیں

اسلام ٹائمز۔ کوئٹہ کے راستے افغانستان میں نیٹو افواج کے لئے سپلائی 12 ویں دن بھی بند ہے۔ صوبے کے مختلف ٹرمینلز پر سینکڑوں ٹرالر اور آئل ٹینکرز کھڑے ہیں۔ مہمندایجنسی کے علاقے میں نیٹو افواج کی جانب سے 26 نومبر کو پاکستانی حدود کی خلاف ورزی اور فائرنگ کے نیتجے میں فوجی جوانوں کی شہادت کے خلاف کراچی سے بلوچستان کے راستے افغانستان میں موجود نیٹو افواج کی سپلائی 12 ویں روز بھی بند ہے۔ کوئٹہ،چمن اور صوبے کے دیگر علاقوں میں ٹرمینلز پر سینکڑوں کی تعداد میں کنٹینرز، ٹرالر اور آئل ٹینکرز کھڑے ہیں۔ ادھر پاکستان کے راستے سپلائی کی بندش کے بعد افغانستان میں تعینات اتحادی افواج کی مشکلات میں اضافہ ہو گیا ہے اور اسے ضروری آپریشن بھی ملتوی کرنا پڑ رہے ہیں۔