وزیراعظم کے سپریم کورٹ کے احاطے میں گاڑی لے جانے پر پابندی

اسلام ٹائمز۔ وزیراعظم سید یوسف رضا گیلانی کو کل سپریم کورٹ کے احاطے میں گاڑی لے جانے سے روک دیا گیا۔ وزیراعظم کل توہین عدالت کیس کے لئے عدالت میں پیش ہونگے۔ ذرائع کے مطابق وزیراعظم گیلانی اپنی گاڑی سپریم کورٹ کے احاطے سے باہر پارک کر کے پیدل عدالت جائیں گے۔ اس صورتحال پر میڈیا سے گفتگو کرتے ہوئے سابق وفاقی وزیر اطلاعات و نشریات اور پیپلز پارٹی کے رہنماء قمر زمان کائرہ کا کہنا تھا کہ لاپتہ افراد کیس کی وجہ سے سکیورٹی خدشات بڑھ گئے ہیں اس لئے وزیر اعظم کو کل اپنی گاڑی کے ہمراہ عدالت میں آنے کی اجازت دی جائے۔