پاراچنار بم دھماکے کی شدید مذمت کرتے ہے، نواب رئیسانی

اسلام ٹائمز۔ وزیراعلٰی نواب محمد اسلم خان رئیسانی نے پاراچنار میں ہونے والے خودکش بم دھماکے کی مذمت کرتے ہوئے دھماکے میں معصوم اور بےگناہ افراد کے جاں بحق ہونے پر دلی غم و رنج کا اظہار کیا ہے۔ ایک بیان میں وزیراعلٰی نے کہا ہے کہ معصوم انسانی جانوں کو نشانہ بنانے کی اجازت دنیا کا کوئی دین و مذہب و معاشرہ نہیں دیتا اور اس میں ملوث عناصر کا تعلق کسی مذہب سے نہیں اورنہ ہی وہ انسانیت کے زمرے میں آتے ہیں۔ 

انہوں نے کہا کہ بم دھماکوں اور تشدد کی دیگر کاروائیوں کا مقصد عوام میں بےچینی پیدا کرنا اور ملک کی جڑوں کو کمزور کرنا ہے۔ تاہم پاکستانی قوم ایسی کارروائیوں سے مرعوب نہیں ‌ہو گی اور ملک دشمن عناصر کو انکے مذموم مقاصد میں ہرگز کامیاب نہیں ہونے دیا جائے گا۔ وزیراعلٰی نے بم دھماکے میں جاں بحق ہونے والے افراد کے خاندانوں سے ہمدردی اور تعزیت کا اظہار کیا،وزیراعلٰی نے زخمیوں کی جلد صحت یابی کی دعا بھی کی ہے۔