شہدائے گیاری کو ملکی دفاع کی تاریخ میں ہمیشہ یاد رکھا جائے گا، بلتستان کی عوام کا مؤقف

اسلام ٹائمز۔ گیاری سیکٹر میں برفانی تودے تلے دبنے والے پاک فوج کے اہل کاروں شہادت کے سرکاری اعلان کے بعد سکردو سے تعلق رکھنے والے شہداء کے گھروں میں تعزیت کیلئے جانے والے لوگوں کا تانتا بندھ گیا۔ سات اپریل کے حادثے میں دب جانے والے پاک فوج کے اہل کاروں کی شہادت کے اعلان کے بعد ان شہداء کے گھر والوں سے لوگ اظہار تعزیت کیلئے جارہے ہیں۔ جبکہ شہداء کے گھروں میں ماحول سوگوار ہوگیا۔ اس حوالے سے عوام کا کہنا ہے کہ گیاری شہداء پر پوری قوم کو فخر ہے اور 52 روز جس کشمکش میں ان شہداء کے لواحقین رہے ہیں یقیناً اذیت ناک مرحلہ تھا۔ لوگوں نے کہا کہ شہدائے گیاری کو ملکی دفاع کی تاریخ میں ہمیشہ یاد رکھا جائے گا۔