نبی اکرم ص نے پیٹ سے پتھر باندھ کر اسلام پھیلایا نہ کہ بم باندھ کر، سید اظہار بخاری

اسلام ٹائمز۔ شیر خدا علی مرتضی ع کو تلوار خدا دیتا ہے تو بیٹی رسول خدا ص۔ اگر علی ع کی ولایت کا اعتراف نہیں کیا جاتا تو حج قابل قبول نہیں ہے۔ ان خیالات کا اظہار جمعیت علماء پاکستان کے رہنما و معروف عالم دین سید اظہار حسین شاہ بخاری نے ولادت امیرالمومنین حضرت علی علیہ السلام کے سلسلے میں مرکزی امام حسین کونسل کے زیراہتمام پرل کانٹی نینٹل ہوٹل راولپنڈی میں منعقدہ ایک عظیم الشان کانفرنس سے خطاب کرتے ہوئے کیا۔
ممتاز عالم دین کا کہنا تھا کہ آج اسلام کا بیڑہ غرق کرنے والے دہشتگرد نبی اکرم ص کے دور میں بھی ان کے درپے تھے۔ ان کا کہنا تھا کہ نبی اکرم ص نے پیٹ سے پتھر باندھ کر اسلام پھیلایا نہ کہ بم باندھ کر۔ آج پاکستان کو بچانے کے لئے تمام امت مسلمہ کو ولایت علی ع پر متحد ہونا ہوگا، تاکہ عالمی دہشتگرد طاقتیں امریکہ و اسرائیل اپنے عزائم میں ناکام ہو جائیں۔