حکمرانوں نے دہشتگرد بن کر جان بوجھ کر لوڈ شیڈنگ کا عذاب مسلط کیا، امیر مقام

اسلام ٹائمز۔ پاکستان مسلم لیگ (ن) کے مرکزی سینئر نائب صدر امیر مقام نے کہا ہے کہ حکمرانوں نے خود دہشت گرد بن کر خود ساختہ لوڈ شیڈنگ کرکے عوام دشمنی میں کوئی کسر نہیں چھوڑی، ملک کو موجودہ بحرانوں سے نکالنے کے لیے محب وطن قیادت کی ضرورت ہے جو صرف مسلم لیگ ہی فراہم کر سکتی ہے، ان خیالات کا اظہار انہوں نے حیات آباد پشاور میں مختلف وفود سے بات چیت کرتے ہوئے کیا۔ ان کا کہنا تھا کہ پورے صوبے میں ہمارے دور کے گیس کے منصوبوں کا ابھی تک مکمل نہ ہونا اور ان منصوبوں کے لیے لگائے گئے پائیپوں کا زنگ آلود ہو کر ناکارہ ہو جانا موجودہ حکمرانوں کی نا اہلی ہے، انہوں نے کہا کہ اگر اللہ تعالیٰ نے دوبارہ عوام کی خدمت کا موقع دیا تو انشاء اللہ یہ منصوبے ہم ہی مکمل کریں گے۔