QR Code
حکومت شفاف انتخابات کرانے کا عزم کئے ہوئے ہے، وزیر اعظم
30 Jul 2012 01:48
اسلام ٹائمز: راجہ پرویز اشرف نے یوسف رضا گیلانی کے ساتھ ملاقات میں کہا کہ عبدالقادر گیلانی کی کامیابی حکومت کی عوام دوست پالیسیوں کی عکاسی کرتی ہے۔
اسلام ٹائمز۔ وزیراعظم راجہ پرویز اشرف نے سابق وزیراعظم یوسف رضا گیلانی سے ملاقات کی اور انہیں عبدالقادر گیلانی کی ضمنی انتخاب میں کامیابی پر مبارکباد پیش کی، وزیراعظم کا کہنا ہے کہ عبدالقادر گیلانی کی کامیابی نے پیپلزپارٹی کی مقبولیت پر شک کرنے والوں کو خاموش کردیا ہے۔ ترجمان وزیراعظم ہائوس کے مطابق وزیراعظم راجہ پرویز اشرف نے ایوان صدر میں سابق وزیراعظم سید یوسف رضا گیلانی سے ملاقات کی، دو گھنٹے تک جاری رہنے والی اس ملاقات میں ملک کی مجموعی سیاسی صورتحال سمیت اہم امور پر تبادلہ خیال کیا گیا۔
وزیراعظم راجہ پرویز اشرف نے کہا کہ آئین کی بالادستی کیلئے یوسف گیلانی کے عزم کو طویل عرصے تک یاد رکھا جائے گا، حکومت آزادانہ اور شفاف انتخابات کرانے کا عزم کئے ہوئے ہے اور فخرالدین جی ابراہیم کی بطور چیف الیکشن کمشنر تقرری سے انتخابات سے متعلق قیاس آرائیاں ختم ہوجانی چاہئیں۔
خبر کا کوڈ: 183327