غزہ میں اسرائیلی فوج کے حملے میں دو فلسطینی شہید ہوگئے جبکہ مغربی کنارے میں چھاپے مار کر فلسطین کے سابق نائب وزیراعظم اور ارکان پارلیمنٹ سمیت حماس کے ۲۰ ارکان کو گرفتار کر لیا گیا۔ غیر ملکی خبر ایجنسی کے مطابق اسرائیلی فوج نے علی الصبح غزہ کے وسطی علاقے میں حملہ کیا جس میں الفتح کے عسکری ونگ الاقصیٰ بریگیڈ کے دو ارکان شہید ہو گئے۔ ادھر مغربی کنارے میں اسرائیلی فوج نے چھاپے مار کر حماس کے متعدد رہنمائوں اور ارکان کو گرفتار کر لیا جن میں سابق نائب وزیراعظم ناصر شاہر، ارکان پارلیمنٹ اور دیگر شامل ہیں۔ اسرائیلی کارروائیوں کو حماس کی قید میں اسرائیلی فوجی کی رہائی کیلئے دبائو قرار دیا جا رہا ہے۔ اسرائیلی فوجی حکام نے ۲۰ فلسطینیوں کو حراست میں لینے کی تصدیق کی ہے۔