کامرہ ایئربیس، حملے کے بعد سکیورٹی ہائی الرٹ

اسلام ٹائمز۔ کامرہ ایئربیس پر دہشت گردوں کے حملے کے بعد سکیورٹی انتہائی سخت کردی گئی ہے۔ ملحقہ علاقوں میں پولیس اور دیگر ایجنسیوں کا سرچ آپریشن جاری ہے۔ پاکستان ایرو ناٹیکل کمپلیکس کی جانب صرف ان افراد کو اندر آنے کی اجازت ہے جنہیں ائیر فورس کی طرف سے خصوصی کارڈ جاری کیے گئے ہیں۔ سرچ آپریشن کی نگرانی ڈی پی او اٹک ہلال خان کررہے ہیں۔ ضلع بھر کی تمام اہم تنصیبات، سرکاری دفاتر اور غیر ملکیوں کی رہائش گاہوں پر مامور سکیورٹی ڈیوٹی کو انتہائی الرٹ کر دیا گیا ہے۔ پولیس کی تحقیقات بھی جاری ہیں گذشتہ روز حراست میں لیے گئے تیرہ مشکوک افراد میں سے بیشتر کو رہا کردیا گیا۔ سکیورٹی اہلکاروں نے دہشت گردوں کی لاشیں خفیہ مقام پر منتقل کردی ہیں۔