QR Code

طاہر القادری کا کراچی اور لاہور سانحات میں بے سہارا ہو جانیوالے بچوں کی کفالت کا اعلان

13 Sep 2012 22:49

اسلام ٹائمز:تحریک منہاج القرآن کے سربراہ کا کہنا ہے کہ انسانی المیے نے سینکڑوں گھروں کے چراغ ہی گل نہیں کئے بلکہ سنگین اقتصادی مشکلات بھی پیدا کر دی ہیں، ساری قوم کو اجتماعی طور پر توبہ اور اپنے گناہوں کی معا فی مانگنی چاہیے۔

اسلام ٹائمز۔ شیخ الاسلام ڈاکٹر محمد طاہر القا دری نے کہا ہے کہ کراچی اور لاہور میں آتشزدگی کے افسوسناک سانحات میں ہونیوالی انسانی ہلاکتوں پر ساری قوم سوگوار ہے، ان اندوہناک سانحات کی صورت میں رونما ہونیوالے انسانی المیے نے سینکڑوں گھروں کے چراغ ہی گل نہیں کئے بلکہ ان گھرانوں کیلئے سنگین اقتصادی مشکلات بھی پیدا کی ہیں، جاں بحق ہونیوالے اکثر مزدور اپنے خاندانوں کے واحد کفیل تھے۔

شیخ الاسلام ڈاکٹر محمد طاہر القادری نے اس خوفناک حادثے میں بے سہارا اور یتیم ہو جانے والے مستقبل کے معماروں کو منہاج ویلفیئر فاؤنڈیشن کے تحت قائم یتیم و بے سہارا بچوں کی کفالت کے عظیم منصوبے آغوش میں لینے کا اعلان کیا ہے۔ منہاج ویلفیئر فاؤنڈیشن ان بچوں کی تعلیم و تربیت، رہائش اور کفالت کا مکمل ذمہ اٹھائے گی اور ان متاثرہ بچوں کو معاشرے کا مفید شہری بننے کا موقع فراہم کرے گی۔ ڈاکٹر محمد طاہر القادری نے کہا ہے کہ دھرتی پر دکھوں کا بوجھ بڑھ رہا ہے تو یہ یقیناً ہمارے بد اعمال کا نتیجہ ہے۔

انہوں نے کہا کہ ہمیں ان انسانی المیوں سے نجات کے اسباب پر بھی نگاہ ڈالنا ہو گی اور اپنے ناراض رب کو راضی کرنے کے جتن بھی کرنا ہونگے، ساری قوم کو اجتماعی طور پر توبہ کرنے کا اہتمام کرنا چاہیے اور خدا کے حضور سر بسجود ہو کر اپنے گناہوں کی معا فی مانگنی چاہیے۔ انہوں نے لاہور اور کراچی میں آتشزدگی کے واقعات سے ہونیوالے انسانی جانوں کے ضیاع کو عظیم قومی سانحہ قرار دیا۔

خبر کا کوڈ: 195237