اسلام ٹائمز۔ پاکستان کی پارلیمانی کمیٹی برائے کشمیر کے چیئرمین مولانا فضل الرحمان نے کہا ہے کہ جموں و کشمیر پر بھارت کا قبضہ اس کی 8 لاکھ فوج اور کالے قوانین کی وجہ سے ہے، انہوں نے اپنے ایک بیان میں کہا کہ بھارت پچھلی 6 دہائیوں سے اپنی فوجی طاقت کے بل بوتے پر کشمیر پر قابض ہے، فضل الرحمان کا کہنا تھا کہ بھارت نے مقبوضہ کشمیر پر اپنے تسلط کو برقرار رکھنے کے لئے 8 لاکھ سے زائد فوج تعینات کی ہے، جو وہاں رائج کالے قوانین کی چھتری تلے اپنے آپ کو محفوط سمجھتی ہے، انہوں نے کہا کہ یہی وجہ ہے کہ بھارتی فوج ان بدنام زمانہ کالے قوانین کی منسوخی کے سخت خلاف ہے۔
مولانا فضل الرحمان نے کہا ہے کہ کشمیر پر بھارتی تسلط کو مضبوط کرنے کے لئے امریکہ اور اسرائیل بھارت کو نہ صرف جدید اسلحہ دے رہے ہیں بلکہ اسی کی فوجی مداد بھی کر رہے ہیں، انہوں نے کہا کہ آج بھارت جموں و کشمیر سے اپنی فوج نکالے اور کالے قوانین کو منسوخ کرے تو اسے کو پتہ چل جائے گا کہ کشمیری عوام کیا چاہتی ہے۔