اسلام ٹائمز۔ ضلعی ہیڈکوارٹر ہسپتال گلگت میں ہیٹنگ کا بندوبست نہ ہونے پر مریض پریشانی سے دوچار ہوگئے ہیں۔ نمونیا اور دمے کے مرض سمیت دیگر امراض میں مبتلا ہوکر ہسپتال میں ایڈمٹ ہونے والے مریضوں کے لئے ہیٹنگ کا کوئی انتظام موجود نہیں ہے۔ ڈی ایچ کیو ہسپتال میں زیر علاج مریضوں کے لئے شدید سردی کے موسم میں کسی قسم کی سہولیات فراہم نہیں کی جارہی ہیں۔ ذرائع کے مطابق جو بھی مریض ہسپتال میں ایڈمٹ ہوتا ہے، ہیٹنگ سہولیات کی عدم دستیابی کے باعث اس کا مرض زیادہ شدت اختیار کر رہا ہے۔ مریضوں کا کہنا ہے کہ ہسپتال انتظامیہ مریضوں کے لئے ہیٹنگ کا مناسب انتظام کرے۔

ہسپتال ذرائع کے مطابق مالی بحران کی وجہ سے ڈی ایچ کیو ہسپتال کے لئے کسی قسم کا بجٹ فراہم نہیں کیا گیا ہے ،جس کی وجہ سے ایمبولینسوں کو تیل فراہم کرنے اور ادویات کی خریداری کے لئے بھی پیسے نہیں ہیں تو ایسی صورتحال میں کہاں سے ہیٹنگ سہولیات فراہم کی جائیں گی، اس لئے جب تک بجٹ فراہم نہیں کیا جاتا ہے تب تک ہیٹنگ سہولیات فراہم کرنا ممکن نہیں ہے۔

اسلام ٹائمز