اسلام ٹائمز۔ متحدہ قومی موومنٹ کی رابطہ کمیٹی نے شہر میں فرقہ واریت کی بنیاد پر بے گناہ شہریوں کے بہیمانہ قتل کی سخت ترین الفاظ میں مذمت کی ہے اور اسے شہر میں فرقہ وارانہ فسادات کی آگ بھڑکانے کی گھناؤنی سازش قرار دیا ہے۔ ایک بیان میں رابطہ کمیٹی نے کہا کہ سوچی سمجھی سازش کے تحت شہر میں فرقہ واریت کی بنیاد پر قتل و غارت گری کا بازار گرم کرکے دہشت گرد نہ نہ صرف شہر کا امن و سکون تباہ کر رہے ہیں بلکہ پاکستان کو عدم استحکام سے دوچار کرنا چاہتے ہیں۔

رابطہ کمیٹی نے کہا کہ جو عناصر اپنے مذموم مقاصد کی تکمیل کیلئے بے گناہ شہریوں کی قیمتی جان و مال سے کھیل رہے ہیں ان کا کسی مذہب و مسلک سے تعلق نہیں ہوسکتا اور وہ اتحاد بین المسلمین کے کھلے دشمن ہیں۔ رابطہ کمیٹی نے شہر میں فرقہ واریت کی بنیاد پر قتل کئے جانے والے تمام افراد کے سوگوار لواحقین سے دلی تعزیت و ہمدردی کا اظہار کرتے ہوئے انہیں صبر کی تلقین کی اور مقتولین کے بلند درجات کے لئے دعا بھی کی۔

رابطہ کمیٹی نے صدر پاکستان آصف علی زردای، وزیراعظم راجہ پرویز اشرف، وفاقی وزیر داخلہ رحمن ملک، گورنر سندھ ڈاکٹر عشرت العباد اور وزیراعلی سندھ سید قائم علی شاہ سے مطالبہ کیا کہ شہر میں فرقہ واریت کی بنیاد پر معصوم افراد کے قتل کا نوٹس لیا جائے اور فرقہ وارانہ قتل و غارت گری میں ملوث دہشت گردوں کو فی الفور گرفتار کرکے قانون کے مطابق سخت سے سخت سزا دی جائے اور بلاتفریق عوام کی جان و مال کے تحفظ کیلئے ٹھوس و مثبت اقدامات بروئے کار لائے جائیں۔

اسلام ٹائمز