QR CodeQR Code

ملت اسلامیہ کے تمام مسائل کا حل اتحاد و وحدت میں مضمر ہے، علامہ ساجد نقوی

24 Jan 2013 15:10

اسلام ٹائمز: عید میلادالنبی (ص) پر اپنے پیغام میں سربراہ ایس یو سی نے کہا کہ تمام مسلمانوں کو چاہیے کہ حضور اکرم (ص) کی سیرت، سنت اور فرامین پر عمل کریں۔


اسلام ٹائمز۔ اسلامی دنیا جن مشکلات اور مصائب سے دوچار ہے، اُن کے خاتمے اور دیگر مسائل کا واحد حل عالم اسلام کے وحدت و اتحاد میں مضمر ہے۔ اُمت مسلمہ کو اسلام کا حقیقی پیغام جہاں دنیائے عالم میں پھیلانا ہے، وہاں اپنی صفوں میں موجود ایسے شرپسند اور اسلام کا لبادہ اوڑھے اسلام دشمن قوتوں کے آلہ کاروں کو بےنقاب کرنے کی بھی ضرورت ہے۔ ان خیالات کا اظہار سینئر نائب صدر ملی یکجہتی کونسل پاکستان علامہ سید ساجد علی نقوی نے میلادالنبی (ص) کی مناسبت سے ہفتہ وحدت 12 تا 17 ربیع الاول کے آغاز پر اپنے خصوصی پیغام میں اسلامیان عالم سمیت اسلامیان پاکستان کو مبارک باد پیش کرتے ہوئے کیا۔ سربراہ شیعہ علماء کونسل نے کہا کہ موجودہ پر فتن اور سنگین حالات میں ہمیں پیغمبر گرامی (ص) کی سیرت سے درس لیتے ہوئے باہمی اختلافات اور فروعی و جزوی مسائل کے حل کے لئے امن، محبت، رواداری، تحمل اور برداشت کا راستہ اختیار کرنا ہوگا۔ امت مسلمہ میں شیعہ سنی کی تفریق اور مسلکی اختلافات کے خاتمے، امن و آشتی کے فروغ کا راستہ اپنانا ہوگا، تاکہ ہم خدا اور خاتم الانبیاء (ص) کی خوشنودی حاصل کرسکیں۔

علامہ ساجد نقوی نے یہ بات زور دے کر کہی کہ خاتم المرسلین (ص) کی میلاد کا جشن منانے کا سب سے بہتر اور موزوں طریقہ یہ ہے کہ امت مسلمہ بالخصوص اور عالم انسانیت بالعموم حضور اکرم(ص) کی سیرت، سنت اور فرامین پر عمل کرے اور اپنی انفرادی، اجتماعی، روحانی، دینی و دنیاوی مسائل کا حل تلاش کرنے کے لئے حضور اکرم (ص) کے اسوہ حسنہ کو نمونہ عمل قرار دے۔ علامہ سید ساجد علی نقوی نے کہا ہے کہ پیغمبر اکرم (ص) نے قرآن کریم، اہل بیت(ع)، احادیث اور اسلامی تعلیمات کی شکل میں نظریہ اور اپنی سیرت عالیہ کی شکل میں عمل کا جو اثاثہ ہمارے لئے چھوڑا ہے، اس پر صحیح معنوں میں عمل کرنا ہی ہمارے لئے باعث نجات ہے۔ قرآنی تعلیمات اور اسلام کی عملی تعبیر کے لئے ہمیں سیرت رسول اکرم (ص) سے استفادہ کرنا ہوگا، لیکن بدقسمتی سے امت مسلمہ عملی طور پر ان تعلیمات پر عمل پیرا نہیں ہے، جس کی وجہ سے مسلسل مصائب و آلام میں مبتلا ہے۔

علامہ ساجد علی نقوی نے عوام اور کارکنوں کو ہدایت کی کہ وہ ہفتہ وحدت کے دوران تمام مسالک اور مکاتب فکر کے مابین وحدت و یگانگت ایجاد کرنے اور فرقہ وارانہ ہم آہنگی کے فروغ کے لئے مشترکہ پروگرامز اور اجتماعات منعقد کریں اور سینکڑوں مشترکات کو بنیاد بنا کر معمولی اور جزوی نوعیت کے اختلافی مسائل کو پس پشت ڈال کر ملت اسلامیہ کی وحدت کا عملی مظاہرہ کریں اور انسانیت دشمن عناصر پر واضح کریں کہ وہ ان کے اتحاد و وحدت کو کسی صورت نقصان نہیں پہنچا سکتے۔


خبر کا کوڈ: 234244

خبر کا ایڈریس :
https://www.islamtimes.org/ur/news/234244/ملت-اسلامیہ-کے-تمام-مسائل-کا-حل-اتحاد-وحدت-میں-مضمر-ہے-علامہ-ساجد-نقوی

اسلام ٹائمز
  https://www.islamtimes.org