اسلام ٹائمز۔ وفاقی بجٹ میں سرکاری ملازمین کی تنخواہیں نہ بڑھانے پر ملک بھر کی طرح پشاور میں بھی کلرک جمعہ کو سرکاری دفاتر میں حاضر نہیں ہوئے۔ آل پاکستان کلرکس ایسوسی ایشن خیبرپختونخوا کے صدر اسلم خان کے مطابق تنخواہیں نہ بڑھانا ظالمانہ فیصلہ ہے۔ انہوں نے حکومت سے مطالبہ کیا ہے کہ سرکاری ملازمین کی تنخواہوں میں پچاس فیصد اضافہ کیا جائے۔ اسلم خان کے مطابق آئندہ کا لائحہ عمل طے کرنے کیلئے پشاور میں آل پاکستان کلرکس ایسوسی ایشن کی جنرل باڈی اجلاس بھی طلب کیا گیا ہے۔ جس میں آئندہ کا لائحہ عمل طے کیا جائے گا۔