QR Code

بی بی زینب (س) کے روضہ مبارک پر حملہ کی شدید مذمت

مساجد اور مزارات پر حملے کرنیوالوں کے حق میں صفائیاں پیش کرنیوالے ظلم عظیم کر رہے ہیں، علامہ طاہر اشرفی

21 Jul 2013 01:56

اسلام ٹائمز: ایک نجی ٹی وی کے پروگرام میں گفتگو کرتے ہوئے پاکستان علماء کونسل کے چیئرمین کا کہنا تھا کہ بی بی زینب کے روضہ پر حملہ کی جتنی مذمت کی جائے کم ہے۔ روز محشر اگر بی بی زینب نے اپنے نانا سے گلہ کیا تو ہم رسول اللہ (ص) کو کیا منہ دکھائیں گے۔

اسلام ٹائمز۔ چیئرمین پاکستان علماء کونسل علامہ طاہر اشرفی نے بی بی زینب (س) کے روضہ مبارک پر حملہ کی مذمت کرتے ہوئے کہا ہے کہ مساجد اور مزارات پر حملے کرنے والوں کے حق میں صفائیاں پیش کرنے والے ظلم عظیم کر رہے ہیں۔ ان خیالات کا اظہار انہوں نے ایک نجی ٹی وی چینل سماء نیوز کے پروگرام میں ٹیلی فونک گفتگو کرتے ہوئے کیا۔ ان کا کہنا تھا کہ بی بی زینب کے مزار پر دہشتگردوں کا حملہ انتہائی قابل مذمت ہے، ہونا تو یہ چاہئے تھا کہ آج کا دن اس حوالے سے مختص کیا جاتا اور اس حملہ کی شدید الفاظ میں مذمت کی جاتی۔ انہوں نے کہا کہ مساجد اور مزارات پر حملے کرنا دہشتگردی ہے، اور جو لوگ ایسا کرنے والوں کے حق میں صفائیاں پیش کرتے ہیں وہ ظلم عظیم کرتے ہیں۔ ان کا کہنا تھا کہ بی بی زینب کے روضہ پر حملہ کی جتنی مذمت کی جائے کم ہے۔ روز محشر اگر بی بی زینب نے اپنے نانا سے گلہ کیا تو ہم رسول اللہ (ص) کو کیا منہ دکھائیں گے۔

خبر کا کوڈ: 285197