اسلام ٹائمز۔ پیپلز پارٹی کے رہنما میاں رضا ربانی نے مطالبہ کیا ہے کہ دہشتگردی کیخلاف بنائی جانے والی قومی پالیسی کیلئے ملٹری اور سول بیوروکریسی پر انحصار نہ کیا جائے۔ کراچی پریس کلب میں نیوز کانفرنس کے دوران رضا ربانی کا کہنا تھا کہ قومی پالیسی کے لیے پارلیمانی کمیٹی کی تجاویز بھی زیر غور لائی جائیں۔ پالیسی کے لیے ملٹری اور سول بیوروکریسی پر انحصار کی ضرورت نہیں۔ رضا ربانی کا کہنا تھا کہ پاک بھارت سرحدوں کی صورت حال سے قومی سطح پر نمٹا جائے کیونکہ یہ وفاق کی بقا کا معاملہ ہے۔ انہوں نے مطالبہ کیا کہ دفاعی کمیٹی کے اجلاس میں وزرائے اعلٰی کو بھی شریک کیا جائے۔