QR Code
علامہ اقتدار نقوی کا نشتر ہسپتال کا دورہ، سانحہ بھکر کے زخمیوں کی عیادت کی
24 Aug 2013 18:21
اسلام ٹائمز: عیادت کے بعد صحافیوں سے گفتگو کرتے ہوئے ایم ڈبلیو ایم ملتان کے سیکرٹری جنرل کا کہنا تھا کہ انتظامیہ کی سرپرستی میں ہونے والے سانحے کی پُر زور مذمت کرتے ہیں اور حکومت سے مطالبہ کرتے ہیں کہ واقعہ کی جوڈیشل انکوائری کرائی جائے۔
اسلام ٹائمز۔ مجلس وحدت مسلمین ملتان کے سیکرٹری جنرل علامہ سید اقتدار حسین نقوی نے ایک وفد کے ہمراہ نشتر ہسپتال میں گزشتہ روز کوٹلہ جام اور دریاخان میں تکفیریوں کی فائرنگ سے زخمی ہونے والے افراد کی عیادت کی۔ زخموں کی شدت کی وجہ سے بھکر ہیڈ کوارٹر ہسپتال سے تین زخمیوں کو رات گئے نشتر ہسپتال منتقل کیا گیا تھا۔ مجلس وحدت مسلمین کے وفد میں علامہ اقتدار نقوی کے علاوہ ڈپٹی سیکرٹری جنرل سلیم عباس صدیقی، مہر سخاوت علی، سید دلاورعباس زیدی، مرزا وجاہت علی کے علاوہ امامیہ اسٹوڈنٹس آرگنائزیشن ملتان کے صدر تہورحیدری شامل تھے۔ زخمیوں کی عیادت کے بعد میڈیا سے گفتگو کرتے ہوئے علامہ اقتدار نقوی کا کہنا تھا کہ انتظامیہ سرپرستی میں ہونے والے سانحے کی پُرزور مذمت کرتے ہیں اور حکومت سے مطالبہ کرتے ہیں کہ واقعہ کی جوڈیشل انکوائری کرائی جائے۔ اُنہوں نے کہا کہ اگر سانحہ کے ذمہ داران کو فی الفور گرفتار نہ کیا گیا تو حالات کی ذمہ داری انتظامیہ پر ہوگی۔ اُنہوں نے کہا کہ مجلس وحدت مسلمین پورے پاکستان کی طرح ملتان میں بھی سانحہ بھکر کے خلاف احتجاج کرے گی۔
خبر کا کوڈ: 295315