کراچی، رینجرز اور پولیس کا عیدالاضحیٰ کے دوسرے روز بھی جرائم پیشہ عناصر کیخلاف آپریشن جاری

اسلام ٹائمز۔ عیدالاضحیٰ کے دوسرے روز بھی شہر قائد میں پولیس اور رینجرز کی جانب سے ٹارگٹڈ آپریشن جاری ہے۔ کراچی میں دہشت گردوں اور جرائم پیشہ عناصر کے خلاف آپریشن کے دوران کئی علاقوں میں چھاپے مارے گئے اور پچاس سے زائد ملزمان کو گرفتار کر لیا گیا ہے۔ اطلاعات کے مطابق رینجرز نے اورنگی ٹاون، بلدیہ ٹاون، گلشن غازی، کھارادر، بریگیڈ سمیت شہر کے کئی دیگر علاقوں میں ٹارگٹڈ آپریشن کرکے دو درجن سے زائد ملزمان کو گرفتار کرکے بھاری مقدار میں اسلحہ برآمد کر لیا ہے۔ گرفتار کئے گئے ملزمان کے خلاف مختلف تھانوں میں قتل، اقدام قتل اور ڈکیتی و رہزنی کے مقدمات درج ہیں۔ دوسری جانب ویسٹ پولیس نے بھی شہر کے کئی علاقوں میں ٹارگٹڈ کارروائیوں کے دوران دو درجن سے زائد ملزمان کو گرفتار کرکے اسلحہ، منشیات اور لوٹا ہوا سامان برآمد کرنے کا دعویٰ کیا ہے۔ عیدالاضحیٰ کے پہلے روز بھی پولیس اور رینجرز کی جانب سے کئے گئےٹارگٹڈ آپریشن کے دوران کراچی کے مختلف علاقوں سے 16 سے زائد ملزمان کو حراست میں لے کر ان کے قبضے سے اسلحہ برآمد کیا گیا تھا جب کہ اس موقع پر سیکیورٹی صورتحال کا جائزہ لینے کیلئے ڈی جی رینجرز میجر جنرل رضوان اختر نے شہر کے مختلف علاقوں کا دورہ بھی کیا۔