اسلام ٹائمز۔ ایران پاکستان گیس پائپ لائین منصوبے پر ایران کی جانب سے ایک اور مثبت پیش رفت سامنے آئی ہے، ایران نے گیس کی قیمت دوبارہ طے کرنے کے لئے مذاکرات کی پیشکش کردی۔ غیر ملکی خبر رساں ادارے کے مطابق نیشنل ایرانین گیس کمپنی کے منیجنگ ڈائریکٹر حامد رضا کا کہنا ہے کہ معاہدے کے تحت گیس کے طے کردہ نرخوں میں تبدیلی کی جاسکتی ہے۔ گذشتہ دنوں ایران کی جانب سے معاہدہ ترک کرنے کا عندیہ دیا گیا تھا۔ امریکہ کی جانب سے ایران پر عائد پابندیوں کے باعث یہ گیس پائپ لائین منصوبہ تاخیر کا شکار ہو رہا ہے کیونکہ پاکستان اس منصوبے کیلئے رقم کا بندوبست نہیں کر پا رہا۔ اس کے علاوہ پاکستان یہ بھی چاہتا ہے کہ ایران گیس کی قیمتوں میں نظرثانی کرکے اس کے نرخ میں کمی کرے،7 ارب ڈالر سے زائد مالیت کے منصوبے سے پاکستان یومیہ 750 ملین مکعب فٹ گیس ایران سے درآمد کرسکتا ہے۔