اسلام ٹائمز - امریکہ نے پاک ایران گیس پائپ لائن پر مخالفت کرنی ہے تو ہرجانے کی رقم بھی ادا کرے، خواجہ آصف

امریکہ نے پاک ایران گیس پائپ لائن پر مخالفت کرنی ہے تو ہرجانے کی رقم بھی ادا کرے، خواجہ آصف

اسلام ٹائمز: نجی ٹی وی کیمطابق خواجہ آصف کا کہنا تھا کہ داسو پن بجلی منصوبہ اور بھاشا ڈیم پاکستان کیلئے انتہائی اہم ہیں، امریکہ کیساتھ پاکستان ایران گیس پائپ لائن منصوبے پر بات ہوگی۔ امریکہ کوئلے کے استعمال پر پاکستان کیساتھ دوہری پالیسی اپنا رہا ہے۔

اسلام ٹائمز۔ پاکستان اور امریکہ توانائی ورکنگ گروپ کا دو روزہ اجلاس واشنگٹن میں شروع ہوگیا۔ اجلاس کی صدارت امریکہ کے خصوصی نمائندے اور بین الاقوامی توانائی امور کے رابطہ کار کارلو س، پاکستانی وزیر پیٹرولیم شاہد خاقان عباسی اور پانی و بجلی کے وزیر خواجہ محمد آصف مشترکہ طور پر کر رہے ہیں۔ دوسری طرف امریکی محکمہ خارجہ نے کہا ہے کہ یہ اجلاس پاکستان امریکہ اسٹریٹجک ڈائیلاگ فریم ورک کا حصہ ہے۔ مذاکرات آج بھی جاری رہیں گے۔ نجی ٹی وی کے مطابق خواجہ آصف کا کہنا تھا کہ داسو پن بجلی منصوبہ اور بھاشا ڈیم پاکستان کیلئے انتہائی اہم ہیں، امریکہ کے ساتھ پاکستان ایران گیس پائپ لائن منصوبے پر بات ہوگی۔ امریکہ کوئلے کے استعمال پر پاکستان کے ساتھ دوہری پالیسی اپنا رہا ہے۔
وزیر پٹرولیم شاہد خاقان عباسی نے کہا کہ پاکستان میں گیس کی پیداوار کے وسیع ذخائر ہیں، پاکستان امریکہ سے گیس پیداوار پر تعاون طلب کرے گا، امریکہ سے گیس کی ڈرلنگ اور دیگر معاملات پر تکنیکی معاونت کیلئے بات چیت ہوگی۔ انہوں نے کہا گیس بحران پر قابو پانے کیلئے قطر، اومان، الجزائر اور امریکہ پاکستان کی مدد کرسکتے ہیں۔ اس موقع پر خواجہ آصف نے کہا کہ امریکہ خود کوئلے سے توانائی بناتا ہے اور ہمیں روکتا ہے۔ امریکہ نے پاکستان ایران گیس پائپ لائن پر مخالفت کرنی ہے تو ہرجانے کی رقم بھی ادا کرے۔