مذاکرات وقت کا ضیاع ہیں، فلسطین صرف مسلح مزاحمت سے ہی آزاد ہوگا، خالد مشعل

اسلام ٹائمز۔ اسلامی تحریک مزاحمت ''حماس'' کے سیاسی دفتر کے سربراہ خالد مشعل نے کہا ہے کہ فلسطین کی آزادی مذاکرات سے نہیں بلکہ یہ مسلح جدوجہد سے ہی ممکن ہوگی۔ ملائیشیا کے دورے کے دوران اسلامی یونیورسٹی کوالالمپور میں طلباء کے ایک بڑے اجتماع سے خطاب کے دوران خالد مشعل کا کہنا تھا کہ فلسطین صرف مسلح مزاحمت سے آزاد ہوگا، مذاکرات اس کا کوئی متبادلہ راستہ نہیں ہوسکتے ہیں، یہ وقت کا ضیاع ہے۔ اسرائیل مذکرات کے ذریعے وقت حاصل کرکے فلسطینی شہروں مغربی کنارے اور بیت المقدس میں یہودی توسیع پسندی کے پروگرام پر عمل کر رہا ہے۔ انہوں نے عالمی برادری پر زور دیا کہ وہ غزہ کی پٹی کا محاصرہ ختم کرنے، فلسطین میں یہودی آباد کاری روکنے اور فلسطینی مقدسات کے تحفظ کے حوالے سے اپنی ذمہ داریاں پوری کرے۔ خالد مشعل نے افسوس کا اظہار کرتے ہوئے کہا کہ بعض عرب ممالک بھی غزہ کی پٹی کے محاصرے میں ملوث ہیں۔