اسلام ٹائمز۔ بلتستان ڈویژن کے دونوں اضلاع اسکردو اور گنگچھے میں دوسرے روز بھی برف باری کا سلسلہ وقفے وقفے سے جاری ہے۔ اس دوران نشیبی علاقوں میں چھ انچ اور بالائی علاقوں میں ڈیڑھ فٹ تک برف پڑ چکی ہے۔ گذشتہ شام سے جاری شدید برف باری کے باعث بالائی علاقوں کے علاوہ اسکردو کے مضافاتی علاقوں کی سڑکیں بھی بند ہو گئیں ہیں اور ان علاقوں کا بیرونی دنیا سے ایک بار پھر زمینی رابطہ کٹ گیا۔ برف باری سے شہری علاقوں میں نظام زندگی مفلوج ہوئی ہے۔ برفباری کے باعث کاروباری مراکز اور بازار سنسان ہیں جبکہ سڑکوں پر ٹریفک بھی معطل ہو کر رہ گئی ہے اور لوگ گھروں میں محصور ہو گئے ہیں۔ شدید برف باری کے باعث سردی سے بچنے کے لیے ایندھن کا حصول بھی مشکل ہو گیا ہے۔

اسلام ٹائمز