QR Code
زائرین کی بس پر ہونیوالے دہشتگردانہ حملے کی شدید مذمت کرتے ہیں، علامہ غلام محمد فخرالدین
22 Jan 2014 16:14
اسلام ٹائمز: اپنے مذمتی بیان میں ایم ڈبلیو ایم شعبہ قم کے سیکرٹری جنرل کا کہنا تھا کہ طالبان دہشتگرد مملکت خداداد پاکستان کیلئے کینسر بن چکے ہیں، جن کیخلاف سوائے فوجی آپریشن کے اور کوئی علاج ممکن نہیں۔
اسلام ٹائمز۔ مجلس وحدت مسلمین پاکستان شعبہ قم کے سیکرٹری جنرل علامہ غلام محمد فخرالدین نے منگل کی شام کو مستونگ کے علاقے میں زائرین کی بس پر ہونے والے دہشت گردانہ حملے کی شدید مذمت کرتے ہوئے وزیراعظم، افواج پاکستان کے سربراہ اور بلوچستان حکومت سے مطالبہ کیا ہے کہ وہ مظلوم پاکستانیوں کے دلوں کی آواز کو سنیں اور پاکستان اور اسلام دشمن طالبان دہشت گردوں کے خلاف سخت کارروائی کا اعلان کریں۔ علامہ غلام محمد فخرالدین نے ملک بھر میں ہونے والی دہشت گردانہ کارروائیوں اور سکیورٹی فورسز پر ہونے والے حملوں سمیت کراچی میں پولیو کے قطرے پلانے والے رضاکاروں کی شہادت اور لاہور میں معروف مصنف اصغر ندیم سید پر ہونیوالے قاتلانہ حملے، پشاور میں ٹارگٹ کلنگ کا نشانہ بنائے جانے والے معروف عالم دین مولانا عالم شاہ موسوی کی شہادت کو ملک دشمن اور اسلام دشمن دہشت گردوں کی کارروائی قرار دیا اور کہا کہ طالبان مملکت خداداد پاکستان کے لئے کینسر بن چکے ہیں، جن کے خلاف سوائے فوجی آپریشن کے کوئی اور علاج ممکن نہیں۔
خبر کا کوڈ: 343727