QR Code

حکومت پاک ایران گیس پائپ لائن منصوبہ پر مزید کام نہیں کرسکتی، شاہد خاقان عباسی

25 Feb 2014 08:23

اسلام ٹائمز: قومی اسمبلی میں پوچھے گئے ایک سوال کے جواب میں وزیر پٹرولیم کا کہنا تھا کہ ایران کے خلاف بین الاقوامی پابندیوں کے سبب پاک ایران گیس پائپ لائن منصوبے پر مزید کام ممکن نہیں۔

اسلام ٹائمز۔ پٹرولیم و قدرتی وسائل کے وفاقی وزیر شاہد خاقان عباسی نے گذشتہ روز قومی اسمبلی کو بتایا کہ ایران پاکستان گیس پائپ لائن پروجیکٹ اب زیرِ غور نہیں ہے۔ مسلم لیگ (ن) کی رکن اسمبلی زہرہ ودود کی جانب سے پوچھے گئے ضمنی سوال کے جواب میں انہوں نے کہا ’’بین الاقوامی پابندیوں کی عدم موجودگی میں یہ منصوبہ تین سال کے اندر مکمل ہوسکتا تھا، لیکن اب حکومت اس صورتحال میں اس پر مزید کام نہیں کرسکتی، اس لیے کہ ایران کے خلاف بین الاقوامی پابندیاں سنگین مسئلہ ہیں۔‘‘ سابق صدر آصف علی زرداری اور ان کے ایرانی ہم منصب محمود احمدی نژاد نے گذشتہ سال فروری میں اعلان کیا تھا کہ یہ منصوبہ پندرہ مہینوں میں مکمل ہوجائے گا۔ لیکن اس منصوبے کو آگے بڑھانے کے حوالے سے تجزیہ نگاروں کو موجودہ حکومت کی نیّت پر شک تھا، اس لیے کہ مسلم لیگ نون کی قیادت اور سعودی عرب کا قریبی اتحاد ہے اور سعودی عرب کے بارے میں اطلاعات ہیں کہ وہ اس منصوبے کے خلاف ہے۔ پاکستان اس سال دسمبر اگر اپنے علاقے کے اندر پائپ لائن کی تعمیر میں ناکام ہو جاتا ہے تو اس کو ایک اعشاریہ تین ارب ڈالر کا جرمانہ ادا کرنا پڑے گا، لیکن پٹرولیم کے وزیر نے ایوان کو بتایا کہ منصوبے پر کام صرف ایران کے خلاف پابندیاں اُٹھائے جانے کے بعد ہی کیا جاسکے گا۔ اس منصوبے کے پایۂ تکمیل تک پہنچنے کی حتمی تاریخ پر نظرثانی کے لیے پاکستان ایران کو آمادہ کرنے کی کوشش کر رہا ہے۔

خبر کا کوڈ: 355206