QR Code

بلغاریہ اور ترکی سے ڈی پورٹ ہونے والے 12 پاکستانی کراچی ایئرپورٹ سے گرفتار

7 Jun 2014 23:04

اسلام ٹائمز: ہر سال ہزاروں پاکستانی اپنے بہتر مستقل کی خاطر غیر قانونی طریقوں سے بیرون ملک جانے کی کوشش کرتے ہیں جن میں سے کچھ کو اپنی منزل مل جاتی ہے جبکہ کئی راستے میں درپیش مشکلات کی وجہ سے دم توڑ دیتے ہیں۔

اسلام ٹائمز۔ پاکستانی وفاقی تحقیقاتی ادارے ایف آئی اے نے بلغاریہ اور ترکی سے ڈی پورٹ کئے گئے 12 پاکستانیوں کو وطن واپسی پر حراست میں لے لیا ہے۔ اطلاعات کے مطابق وطن واپس آنے والے 12 میں سے 7 پاکستانی زمینی راستے سے براستہ ترکی یورپ جانا چاہتے تھے تاہم ترکی میں وہ پکڑے گئے اور قانونی تقاضوں کی تکمیل کے بعد انھیں دوبارہ پاکستان بھجوا دیا گیا۔ ڈی پورٹ ہونے والے 5 پاکستانی بلغاریہ میں خصوصی افراد کے لئے منعقدہ کھیلوں کے ایونٹ میں شرکت کے لئے گئے تھے تاہم قومی کھلاڑیوں کی ٹیم جب بلغاریہ پہنچی تو وہ ایونٹ ختم ہوچکا تھا۔ تفتیش کے دوران معلوم ہوا کہ کھلاڑیوں کے گروپ میں سے صرف ایک ہی کھلاڑی قوت گویائی اور سماعت سے محروم ہے باقی تمام لوگ مکمل طور پر بول اور سن سکتے تھے جس کی وجہ سے انھیں بلغاریہ سے بے دخل کر دیا گیا۔

دونوں ملکوں سے بے دخل کئے گئے 12 افراد جب بذریعہ ہوائی جہاز کراچی ایئرپورٹ پہنچے تو ایف آئی اے حکام نے انھیں حراست میں لے کر تفتیش شروع کر دی۔ تحقیقاتی ادارے کے حکام کا کہنا ہے کہ ان افراد سے تفتیش کے ذریعے انسانی اسمگلنگ کے دھندے میں ملوث افراد تک پہنچنے میں مدد ملے گی۔ واضح رہے کہ ہر سال ہزاروں پاکستانی اپنے بہتر مستقل کی خاطر غیر قانونی طریقوں سے بیرون ملک جانے کی کوشش کرتے ہیں جن میں سے کچھ کو اپنی منزل مل جاتی ہے جبکہ کئی راستے میں درپیش مشکلات کی وجہ سے دم توڑ دیتے ہیں۔

خبر کا کوڈ: 390082