QR Code

امت مسلمہ کو تقسیم کرنے کیلئے اسلامی لبادہ اوڑے دشمنوں کی کوششیں جاری ہیں، علامہ مقصود علی ڈومکی

4 Jul 2014 23:18

اسلام ٹائمز: کوئٹہ پریس کلب میں میڈیا سے گفتگو کرتے ہوئے ایم ڈبلیو ایم بلوچستان کے سیکرٹری جنرل کا کہنا تھا کہ بارہ رمضان المبارک 11 جولائی سے ملک بھر میں "زخمی زخمی قدس پکارا، اب تو مسلم جاگ خدارا" کے نام سے آل پارٹیز کانفرنسز اور گول میز کانفرنسز کا انعقاد کیا جائیگا۔ کوئٹہ میں کانفرنس 12 جولائی کو ہوگی۔

اسلام ٹائمز۔ مجلس وحدت مسلمین کے رہنماء علامہ مقصود علی ڈومکی نے کہا ہے کہ فلسطین فاؤنڈیشن پاکستان کے زیراہتمام مسئلہ فلسطین اور قبلہ اول کی بازیابی کیلئے ملک بھر کی طرح کوئٹہ میں بھی "زخمی زخمی قدس پکارا اب تو مسلم جاگ خدارا" کانفرنس کا انعقاد کیا جائیگا۔ امت مسلمہ کو مختلف ناموں پر تقسیم کرنے کیلئے اسلامی لبادہ اوڑے دشمنوں کی جانب سے کوششیں جاری ہیں۔ جن میں سے ایک مسلم ممالک میں دہشت گردی کا فروغ بھی ہے۔ جس کا اصل ہدف مسلمانوں کی جان و مال و عزت و آبرو ہے۔ یہ سب کچھ گریٹر اسرائیل کو بچانے کیلئے کیا جا رہا ہے مگر صیہونی قوتوں کی چال کامیاب نہیں ہونے دی جائیگی۔ انہوں نے یکم جولائی کو غزہ میں اسرائیلی بمباری کی مذمت کی اور کہا کہ اس سے بڑھ کر بربریت کی کوئی مثال نہیں مل سکتی۔ جس کا سلسلہ گذشتہ 66 برسوں سے جاری ہے۔ انہوں نے کہا کہ قبلہ اول کی بازیابی اور مسئلہ فلسطین کے سلسلے میں پوری امت مسلمہ کو اپنی ذمہ داریوں کا احساس کرنا ہوگا۔ اسی لئے بارہ رمضان المبارک 11 جولائی سے ملک بھر میں "زخمی زخمی قدس پکارا، اب تو مسلم جاگ خدارا" کے نام سے آل پارٹیز کانفرنسز اور گول میز کانفرنسز کا انعقاد کیا جائیگا۔ کوئٹہ میں کانفرنس 12 جولائی کو ہوگی۔ جس میں زندگی کے مختلف شعبوں سے تعلق رکھنے والے افراد کو مدعو کیا جائیگا۔ کانفرنس کا مقصد لوگوں کو مسئلہ فلسطین سے آگاہی دینا ہے۔ انہوں نے میڈیا ہاؤسز سے بھی اپیل کی کہ وہ مسئلہ فلسطین کے حوالے سے خصوصی پروگرامز نشر کریں۔

خبر کا کوڈ: 397364