QR Code

خیبر پختونخوا حکومت ٹارگٹ کلنگ پر قابو پانے میں یکسر ناکام ہوچکی ہے، علامہ وحید کاظمی

17 Jul 2014 16:44

اسلام ٹائمز: ایم ڈبلیو ایم خیبر پختونخوا کے ڈپٹی سیکرٹری جنرل کا اپنے ایک مذمتی بیان میں کہنا تھا کہ پشاور ملت تشیع کیلئے قتل گاہ بن چکا ہے، لیکن صوبائی حکومت اور انتظامیہ نے اس حوالے سے آج تک کوئی کارروائی نہیں کی۔

اسلام ٹائمز۔ مجلس وحدت مسلمین خیبر پختونخوا کے ڈپٹی سیکرٹری جنرل علامہ سید وحید عباس کاظمی نے پشاور اور ایبٹ آباد میں ہونے والی ٹارگٹ کلنگ کے واقعات پر شدید ردعمل کا اظہار کرتے ہوئے کہا ہے کہ صوبائی حکومت امن و امان کی صورتحال بہتر بنانے میں یکسر ناکام ہے، آئے روز ٹارگٹ کلنگ کے واقعات میں اضافہ ہو رہا ہے اور دہشتگرد دندناتے پھر رہے ہیں۔ وحدت ہاوس پشاور سے جاری اپنے ایک بیان میں ان کا کہنا تھا کہ پشاور میں مجلس وحدت مسلمین کے کارکن اور معروف نوحہ خواں صباح علی کا قتل حکومت کے امن و امان کی صورتحال بہتر بنانے کے دعووں پر سوالیہ نشان ہے، پشاور ملت تشیع کیلئے قتل گاہ بن چکا ہے، لیکن صوبائی حکومت اور ضلعی انتظامیہ نے اس حوالے سے آج تک کوئی کارروائی نہیں کی، کسی ٹارگٹ کلر کو حراست میں لیا گیا اور نہ ہی کوئی تحقیقاتی کمیشن بنایا گیا۔ انہوں نے گذشتہ دنوں ایبٹ آباد میں ذاکر اہل بیت (ع) سید وسیم عباس شیرازی کی والد کے ہمراہ شہادت کی بھی شدید الفاظ میں مذمت کی، اور قاتلوں کی فوری گرفتاری کا مطالبہ کیا۔ علامہ وحید عباس کاظمی نے پشاور کے شیعہ رہنماء محمد حسینی کی بلاجواز گرفتاری کی بھی مذمت کرتے ہوئے کہا کہ ایک طرف ہمارے ہی لوگ شہید ہو رہے ہیں جبکہ دوسری طرف ہمیں ہی اسیر کیا جا رہا ہے، جو کہ بہت بڑی ناانصافی ہے۔

خبر کا کوڈ: 399986