اسلام ٹائمز۔ گلگت میں مجلس وحدت مسلمین گلگت، پاکستان مسلم لیگ (ق)، پاکستان عوامی تحریک اور سنی اتحاد کونسل کے زیراہتمام انقلاب مارچ کی حمایت میں ریلی نکالی گئی ہے۔ ریلی میں تمام مذکورہ تنظیموں کے رہنماوں اور کارکنان کی بڑی تعداد نے شرکت کی۔ ریلی مجلس وحدت مسلمین پاکستان گلگت بلتستان کے سیکرٹریٹ سے برآمد ہوئی جو مقررہ راستوں سے ہوتی ہوئی ملت پلازہ پر پرامن اختتام پذیر ہوئی۔ ریلی سے مجلس وحدت مسلمین گلگت بلتستان، پاکستان مسلم لیگ (ق)، پاکستان عوامی تحریک اور سنی اتحاد کونسل کے رہنماوں نے خطاب کیا۔ حمایت انقلاب ریلی سے خطاب کرتے ہوئے سیکرٹری جنرل مجلس وحدت مسلمین گلگت بلتستان علامہ آغا نیئر عباس مصطفوی نے کہا کہ ظالم حکومت کے دن گنے جا چکے ہیں اور مزید انکی حکومت قائم نہیں رہے گی۔ انہوں نے کہا کہ ریلی اور دھرنا جمہوریت کا حسن اور قانونی و آئینی عمل ہے اسے روکنے کی کوشش بدترین بادشاہت کی علامت ہے۔

اسلام ٹائمز