اسلام ٹائمز - نواز شریف منتخب وزیراعظم ہیں استعفے کا مطالبہ نہیں کیا جاسکتا، امریکہ

نواز شریف منتخب وزیراعظم ہیں استعفے کا مطالبہ نہیں کیا جاسکتا، امریکہ

اسلام ٹائمز: واشنگٹن میں صحافیوں سے گفتگو میں نائب ترجمان امریکی محکمہ خارجہ کا کہنا تھا کہ پاکستان میں تمام سیاسی فریقین کو تشدد سے گریز کرنا چاہیے، ایسے لوگوں کی حمایت نہیں کرتے جو غیر آئینی فیصلے تھوپنا چاہتے ہیں۔

اسلام ٹائمز۔ امریکہ نے پاکستان میں منتخب حکومت کی حمایت کردی ہے اور محکمہ خارجہ کی نائب ترجمان نے کہا ہے کہ نواز شریف پاکستان کے منتخب وزیراعظم ہیں اس لئے ان سے استعفے کا مطالبہ نہیں کیا جاسکتا۔ واشنگٹن میں صحافیوں سے گفتگو کرتے ہوئے نائب ترجمان امریکی محکمہ خارجہ میری ہارف نے کہا کہ امریکہ پاکستان میں آئینی اور انتخابی عمل کی حمایت کرتا ہے۔ نواز شریف سے مستعفی ہونے کا مطالبہ نہیں کیا جاسکتا۔ ایک سوال کے جواب میں میری ہارف نے کہا کہ مذاکرات کے لئے کافی گنجائش موجود ہے، حالات پرامن رہنے چاہیئں۔ ان کا کہنا تھا پاکستان میں تمام سیاسی فریقین کو تشدد سے گریز کرنا چاہیے، ایسے لوگوں کی حمایت نہیں کرتے جو غیر آئینی فیصلے تھوپنا چاہتے ہیں۔ پاکستان میں جمہوری عمل کی حمایت کا اعلان کرتے ہوئے کہا کہ امریکہ پاکستان کے ساتھ جمہوریت کے لیے کام کر رہا ہے۔