ڈی آئی خان، ریڈ زون میں پولیس گردی کیخلاف پی ٹی آئی کا احتجاجی مظاہرہ

اسلام ٹائمز۔ ڈیرہ اسماعیل خان میں تحریک انصاف کے کارکنوں نے مختلف مقامات پر احتجاجی مظاہرے کئے ہیں۔ اسلام آباد میں پاکستان عوامی تحریک اور پاکستان تحریک انصاف کے دھرنوں پر پولیس کی شیلنگ، فائرنگ اور تشدد کے خلاف پی ٹی آئی کے کارکن سڑکوں پر نکل آئے۔ شہر میں کارکنوں نے کشمیر چوک کو بند کردیا، جبکہ قریشی موڑ پر کارکنوں نے بڑے بڑے پتھر رکھ کے پنجاب جانیوالی تمام تر ٹریفک کو روک دیا۔ جس کی وجہ سے گاڑیوں کی طویل قطاریں لگ گئیں۔ مظاہرین نے وفاقی اور پنجاب حکومت کے خلاف شدید نعرے بازی کی۔ اس موقع پر پولیس کی بھاری نفری بھی تعینات تھی۔ مظاہرین نے ریڈ زون میں پولیس گردی کی شدید مذمت کرتے ہوئے وزیراعظم اور وزیراعلیٰ پنجاب سے فوری طور پر مستعفی ہونے کا مطالبہ کیا ہے۔ مظاہرین نے اعلان کیا کہ میاں برادران کے مستعفی ہونے تک روزانہ کی بنیادوں پر احتجاج کیا جائے گا۔