اسلام ٹائمز - آئی ایس او قائم تھی ہے اور قائم رہے گی، علامہ نیاز نقوی

آئی ایس او قائم تھی ہے اور قائم رہے گی، علامہ نیاز نقوی

اسلام ٹائمز: سالانہ کنونشن سے خطاب میں ممتاز عالم دین کا کہنا تھا کہ آئی ایس او کے مقابلے میں کسی نئے اسٹرکچر کے حامی نہیں، آئی ایس او کے قیادت کو محتاط رہنا ہوگا کہ کوئی انہیں اپنے مقاصد کیلئے استعمال نہ کرے، ہاں آئی ایس او ملی جماعتوں کیساتھ ملکر ملت کیلئے کام ضرور کرے۔

اسلام ٹائمز۔ وفاق المدارس شیعہ کے مرکزی رہنما اور جامعۃ المنتظر لاہور کے پرنسپل علامہ قاضی نیاز حسین نقوی کا آئی ایس او پاکستان کے سالانہ مرکزی پیروان ولایت کنونشن سے خطاب میں کہنا تھا کہ آئی ایس او ملت کے صالح نوجوانوں کی تنظیم ہے، جس کو علمائے کرام کی سرپرستی حاصل ہے۔ انہوں نے کہا کہ آئی ایس او کے قیام میں قبلہ صفدر حسین نجفی کی محنت تھی جبکہ آئی ایس او کی تربیت میں علامہ سید علی الموسوی کا کردار نمایاں تھا، آئی ایس او شہید علامہ عارف حسین کی محنتوں کا بھی ثمر ہے کیونکہ شہید علامہ عارف حسین الحسینی نے بھی آئی ایس او کی تربیت میں نمایاں کردار ادا کیا۔ انہوں نے کہا کہ اگر یہ کہا جائے کہ ملت تشیع کا مستقبل کیا ہے تو بلا مبالغہ کہا جاسکتا ہے کہ ملت تشیع کا مستقبل آئی ایس او ہے۔
علامہ نیاز نقوی نے کہا کہ آئی ایس او کے مقابلے میں کسی نئے اسٹرکچر کے حامی نہیں، آئی ایس او سے کچھ علماء کو شکایات بھی ہیں لیکن آئی ایس او کی قیادت کو محتاط رہنا ہوگا کہ کوئی انہیں اپنے مقاصد کے لئے استعمال نہ کرے، ہاں آئی ایس او ملی جماعتوں کے ساتھ مل کر ملت کے لئے کام ضرور کرے۔ انہوں نے کہا کہ آئی ایس او قائم تھی، قائم ہے اور قائم رہے گی، اس کو کوئی ختم کرسکا ہے اور نہ ختم کرسکے گا۔ انہوں نے کہا کہ میرے سامنے ناصر شیرازی جیسے سیاست دان بھی بیٹھے ہیں، میں ان سے کہوں گا کہ وہ بھی نوجوانوں کی سرپرستی کریں اور ان کی رہنمائی کریں، تاکہ ملت کو متحد رکھنے میں نوجوان اپنا کردار ادا کرسکیں۔ انہوں نے کہا کہ ہم نوجوانوں میں تقسیم کے حامی نہیں، اس لئے جو لوگ نوجوانوں کو تقسیم کرنے کے ایجنڈے پر عمل پیرا ہیں، انہیں ایسی حرکتوں سے باز رہنا چاہئے، اس سے ملت کا نقصان ہے۔