"گو نواز گو" کے نعرے، حمزہ شہباز تقریب سے فرار ہونے پر مجبور

اسلام ٹائمز۔ مسلم لیگ نون کے رہنما حمزہ شہباز کو ہفتہ کو ایک تقریب میں اپنا خطاب اس وقت مختصر کرنا پڑگیا جب ان کی جانب سے اسلام آباد دھرنے کا ذکر کرنے پر برہم طالبعلموں نے اٹھ کر "گو نواز گو" کے نعرے لگانا شروع کردیئے۔ الحمرا آرٹ سینٹر میں عالمی یوم سیاحت کے حوالے سے ٹورازم ڈویلپمنٹ کارپوریشن پنجاب (ٹی ڈی سی پی) کے ایونٹ سے مہمان خصوصی کی حیثیت سے شرکت کرنے والے شریف خاندان کے فرزند کو سرخ چہرے کے ساتھ نکلنا پڑا۔ ذرائع نے میڈیا کو بتایا کہ محکمے نے پنجاب یونیورسٹی کے ٹورازم ڈیپارٹمنٹ اور دیگر سرکاری تعلیمی اداروں سے اس ایونٹ کے لیے طالبعلموں کو بھیجنے کی "درخواست" کی تھی۔ جس پر ان اداروں میں سے ہر ایک نے "ایونٹ کو کامیاب بنانے کے لیے" کم از کم بیس طالبعلموں کو بھیج دیا تھا۔ کسی بدانتطامی سے بچنے کے لیے انتظایہ نے طالبعلموں کی صبح نو بجے آمد کو یقینی بنایا تاہم مہمان خصوصی دوپہر کو ایک بجے تقریب میں پہنچے۔ چار گھنٹے کی تاخیر سے تنگ طالبعلموں کے سامنے حمزہ شہباز نے ملک میں سیاحت پر توجہ سے اپنی تقریر کا آغاز کیا تاہم جیسے ہی ان کی تقریر کا رخ سیاست کی جانب مڑا ہال کا ماحول بدل گیا۔ ایک مضطرب خاتون نے حمزہ شہباز کی تقریر میں دخل دیتے ہوئے کہا، "بہتر ہے کہ آپ خود کو سیاحت کے موضوع تک ہی محدود رکھیں، ہم یہاں سیاست پر لیکچر سننے کے لیے نہیں آئے"۔ نوجوان سیاستدان نے خاتون کو نظرانداز کر دیا اور اپنی تقریر جاری رکھی۔ اس موقع پر طالبعلموں کا ایک گروپ کھڑا ہوگیا اور "گو نواز گو" کے نعرے لگانے لگا، جن کا ساتھ مزید طالبعلموں نے دیا اور وہ اکھٹے ہال سے واک آﺅٹ کرگئے۔ ہال کے باہر بھی وہ کافی دیر تک وی آئی پی کلچر اور شریف برادران کے خلاف نعرے بازی کرتے رہے۔ ٹی ڈی سی پی کے ایک عہدیدار نے فوری طور پر طالبعلموں سے چپ رہنے کی درخواست کی مگر انہوں نے اسے مسترد کردیا۔

دوسری جانب حمزہ شہباز بھی ان طالبعلموں کو نظرانداز کرنے کے مشورے کو "نظرانداز" کرکے احتجاجی انداز میں وہاں سے پچھلے دروازے سے چلے گئے۔ ایک استاد نے میڈیاکو بتایا کہ طالبعلم مہمان خصوصی کا چار گھنٹے تک انتظار کرکے بیزار ہو چکے تھے" انہیں پانی تک پینے کی اجازت نہیں دی گئی، اور ایسا لگتا ہے کہ ان کا یہ غصہ حمزہ شہباز کے اوپر نکل گیا"۔ انہوں نے اس خدشے کا اظہار کیا کہ پنجاب حکومت کی جانب سے احتجاجی طالبعلموں کے خلاف ان کے متعلقہ اداروں کے ذریعے ایکشن لیا جا سکتا ہے۔ پنجاب یونیورسٹی سے تعلق رکھنے والے ایک طالبعلم نے نام چھپانے کی شرط پر میڈیا کو بتایا، کہ "ہم یہاں سیاسی تقاریر سننے کے لیے نہیں آئے تھے، ہم ایسی تقریریں گھر میں ٹی وی پر بہت زیادہ سن چکے ہیں"۔ اس نے مزید کہا، "ہم مہمان خصوصی کی تاخیر سے آمد پر بھی احتجاج کررہے تھے، ہمیں وی آئی پی کلچر کی حوصلہ شکنی کرنا چاہیئے"۔ مسلم لیگ نون کے سابق صوبائی وزیر رانا ثناءاللہ نے صورتحال کو معمولی قرار دیتے ہوئے کہا کہ وہ بھی ایسے لوگ پی ٹی آئی کے ایونٹس بھیج سکتے ہیں جو عمران خان مخالف نعرے لگا کر ایسے منظر تخلیق کرسکتے ہیں"۔ ہم پانچ سے سات سو ن لیگی کارکن اتوار کو پی ٹی آئی کے مینار پاکستان کے جلسے میں بھیج کر عمران مخالف نعرے لگوا سکتے ہیں، یہ کوئی بڑی بات نہیں"۔ انہوں نے کہا کہ پی ٹی آئی "خطرناک رجحان" کو فروغ دے رہی ہے۔