کراچی سے لاہور جانیوالی پی آئی اے کی پرواز میں تاخیر پر مسافروں کے’’گو نواز گو‘‘ کے نعرے

اسلام ٹائمز۔ لاہور جانے والی قومی ایئر لائن کی پرواز کی روانگی میں تاخیر سے تنگ آئے ہوئے مسافروں نے ایئرپورٹ پر احتجاج کرتے ہوئے ’’گو نواز گو‘‘ کے نعرے لگا دیئے۔ اطلاعات کے مطابق کراچی سے لاہور جانے والی قومی ایئر لائن کی پرواز کو صبح ساڑھے 8 بجےروانہ ہونا تھا تاہم 8 گھنٹے گزر جانے کے باوجود پرواز روانہ نہ ہوسکی اور مسافر ایئرپورٹ پر پرواز کی روانگی کا انتظار کر رہے ہیں، پی آئی اے انتظامیہ کی جانب سے مسلسل نیا وقت دینے کے بعد پرواز کے مسافروں نے احتجاج کرتے ہوئے ایئرپورٹ پر ہی ’’گو نواز گو‘‘ کے نعرے لگانا شروع کر دیئے۔ واضح رہے کہ کچھ روز قبل کراچی ہی سے اسلام آباد جانے والی ایک پرواز میں 2 ارکان پارلیمنٹ پیپلز پارٹی کے رحمان ملک اور نواز لیگ کے ڈاکٹر رمیش کمار کے باعث ڈھائی گھنٹے تاخیر ہوئی تھی جس پر مسافروں نے احتجاج کرتے ہوئے دونوں ارکان کو طیارے سے باہر نکال دیا تھا۔