QR Code

پاکستان پاک ایران گیس پائپ لائن منصوبے کے لئے درکار مالی ضروریات کے لئے متبادل ذرائع پر غور کر رہا ہے، اسحاق ڈار

14 Oct 2014 11:34

اسلام ٹائمز: وفاقی وزیر خزانہ اور ایران کے وزیر خارجہ کے درمیان واشنگٹن میں ملاقات کے دوران فیصلہ کیا گیا کہ جلد پاک ایران اقتصادی کمیشن کا اجلاس بلا کر منصوبہ پر پیش رفت کو تیز کیا جائے گا۔

اسلام ٹائمز۔ پاکستان نے پاک ایران پائپ لائن منصوبے کے لئے گوادر سے نوابشاہ تک 700 کلومیٹر پائپ لائن کی منظوری دے دی ہے، پاک ایران مشترکہ اقتصادی کمیشن کا اجلاس آئندہ ماہ اسلام آباد میں ہوگاجس میں گیس پائپ لائن کے منصوبوں پر کام کا جائزہ لیا جائے گا۔ اس امر پر اتفاق وفاقی وزیر خزانہ اسحاق ڈار اور ایران کے وزیر خارجہ علی طیب نیا کے درمیان واشنگٹن میں ملاقات کے دوران کیا گیا۔ وزیر خزانہ نے اس موقع پر وزیر اعظم پاکستان کی جانب سے ایرانی سپریم لیڈر اور صدر کے لئے نیک تمناوں کا پیغام پہنچایا۔ ملاقات میں وزیر خزانہ نے کہا کہ پاکستان منصوبے کے لئے درکار مالی ضروریات کے لئے متبادل ذرائع پر غور کر رہا ہے۔ ایرانی وزیر خارجہ نے اس موقع پر منصوبہ کے سلسلہ میں پاکستان کے عزم کو سراہا۔

خبر کا کوڈ: 414525