اسلام ٹائمز۔ یمن میں حوثی شیعہ قبائل نے صدر عبد ربہ منصور ہادی کو نئی حکومت کی تشکیل کے لیے دس دن کا الٹی میٹم دیا ہے اور دھمکی دی ہے کہ اگر ان کے مطالبات پورے نہ کیے گئے تو وہ اقتدار پر قبضہ کرلیں گے۔ میڈیا رپورٹ کے مطابق حوثی شیعوں کی تنظیم انصار اللہ نے جمعہ کو دارالحکومت صنعا میں قریباً تیس ہزار قبائلیوں کی ریلی منعقد کی ہے اور اس اجتماع میں ایک اعلامیہ جاری کیا ہے جس میں انھوں نے صدر عبد ربہ منصور ہادی کو خبردار کیا ہے کہ اگر وہ نئی حکومت کی تشکیل میں ناکام رہتے ہیں تو حوثیوں کے لیے تمام آپشنز کھلے ہیں۔ پاپولر قبائلی اتحاد کے ترجمان ضیف اللہ رسام نے کہا ہے کہ ہمارا اگلا اجلاس فیصلہ سازی کے ہیڈ کوارٹرز میں ہوگا۔ ریلی سے خطاب کرتے ہوئے ایک اور مقرر نجیب المنصوری نے سالویشن ملٹری کونسل کی تشکیل کا مطالبہ کیا ہے۔