اسلام ٹائمز۔ عوامی ایکشن کمیٹی غذر کا احتجاجی دھرنا پانچویں روز بھی جاری، ڈی ایچ کیو ہسپتال میں ڈاکٹروں کی کمی دور کرنے تک دھرنا جاری رکھنے کا فیصلہ کر لیا گیا۔ دھرنے کے پانچویں روز اے سی پونیال اشکومن سلطان خان اور سٹی مجسٹریٹ صفت خان ڈی ایچ او غذر سلیم الدین کے ہمراہ ڈی سی چوک پہنچ گئے جہاں مظاہرین اور ضلعی انتظامیہ کے درمیان طویل مذاکرات ہوئے تاہم مظاہرین نے کہا کہ سپیشلسٹ ڈاکٹروں کی تعیناتی کا اختیار ڈی ایچ او غذر یا ضلعی انتظامیہ کے پاس نہیں، جب تک حکومت کا متعلقہ عہدیدار مذاکرات نہیں کرتا احتجاج جاری رہے گا۔ احتجاجی دھرنے میں بات چیت کے دوران ڈی ایچ او سلیم الدین نے بتایا کہ ضلع غذر میں محدود وسائل کے باوجود سہولیات فراہم کر رہے ہیں، سپیشلٹ ڈاکٹروں کا مسئلہ صرف غذر کا نہیں بلکہ پورے گلگت بلتستان کا ہے، ضلع غذر میں اب بھی سپیشلسٹ ڈاکٹروں کی پوسٹیں خالی ہیں مگر ڈاکٹر آنے کے لیے تیار ہی نہیں۔

اسلام ٹائمز