اسلام ٹائمز - پاکستان تحریک انصاف کا لاہور سے قافلہ روانہ ہو گیا

پاکستان تحریک انصاف کا لاہور سے قافلہ روانہ ہو گیا

اسلام ٹائمز: پنجاب حکومت کی جانب سے پی ٹی آئی کے کارکنوں کی گرفتاریوں کے خدشات کے پیش نظر حکمت عملی تبدیل کر دی گئی اور قائدین کو ہدایت کی گئی ہے کہ وہ اپنے اپنے حلقوں سے نکلیں اور کالا شاہ کاکو انٹر چینج پر جمع ہوں وہاں سے بڑے قافلے کی شکل میں اسلام آباد جائیں گے۔

اسلام ٹائمز۔ پاکستان تحریک انصاف کا اسلام آباد دھرنے کے لئے لاہور سے قافلہ قذافی سٹیڈیم سے روانہ ہو چکا ہے۔ قافلوں میں کارکنوں کی کثیر تعداد شریک ہے۔ تحریک انصاف نے گزشتہ روز اعلان کیا تھا کہ تمام علاقوں سے کارکن قذافی سٹیڈیم جمع ہوں گے اور وہاں سے مشترکہ قافلے کی صورت میں اسلام آباد کے لئے روانہ ہوں گے، لیکن پنجاب حکومت کی جانب سے پی ٹی آئی کے کارکنوں کی گرفتاریوں کے خدشات کے پیش نظر حکمت عملی تبدیل کر دی گئی اور قائدین کو ہدایت کی گئی ہے کہ وہ اپنے اپنے حلقوں سے نکلیں اور کالا شاہ کاکو انٹر چینج پر جمع ہوں، وہاں سے بڑے قافلے کی شکل میں اسلام آباد جائیں گے۔ قذافی سے چند گاڑیاں روانہ ہو چکی ہیں جو ٹھوکر نیاز بیگ انٹر چینج سے موٹروے پر داخل ہوں گی۔ دوسری جانب پنجاب حکومت نے تحریک انصاف کی ریلی کو ناکام بنانے کے لئے لاری اڈہ اور پٹرول پمپ بند کر دیئے ہیں۔ لاری اڈے کو قناعتیں لگا کر بند کر دیا گیا جس کے باعث شہریوں کو شدید مشکلات کا سامنا کرنا پڑ رہا ہے۔ مسافروں کا کہنا ہے کہ حکومت پی ٹی آئی کے جلسے کی آڑ میں عام شہریوں کو تنگ نہ کرے۔ پٹرول پمپس بند ہونے کے باعث بھی شہریوں کو شدید پریشانی کا سامنا کرنا پڑ رہا ہے۔