اسلام ٹائمز۔ اہل بیت (ع) نیوز ایجنسی کی رپورٹ کے مطابق اسلامی جمہوریہ ایران کی وزارت خارجہ کی ترجمان مرضیہ افخم نے ایک بیان میں پاکستان کے شہر پشاور میں فوجی اسکول پر طالبان کے بہیمانہ اور بزدلانہ حملہ میں بے گناہ بچوں کے جاں بحق ہونے پر گہرے دکھ اور رنج کا اظہار کرتے ہوئے اس حملے کی سخت الفاظ میں مذمت کی ہے اور اسے اسلامی، انسانی اور اخلاقی اقدار کے خلاف قرار دیا ہے۔ ترجمان نے غمزدہ اور متاثرہ خاندانوں کے ساتھ ہمدردی کا اظہار کرتے ہوئے کہا ہے کہ دہشت گردی کے پیچھے موزیانہ اور گمراہ کن فکر ہے اور دہشت گردی کے خاتمہ سے قبل اس فکر کا خاتمہ بہت ضروری ہے۔ ترجمان نے اس المناک سانحہ پر پاکستانی حکومت اور عوام کے ساتھ ہمدردی کا اظہار کیا ہے۔