QR Code

سانحہ پشاور سفاکیت، بربریت اور ظلم کی انتہا ہے

دہشتگردوں کیخلاف بے رحمانہ فوجی اور انٹیلی جنس آپریشن کیا جائے، علامہ ناصر عباس جعفری

28 Dec 2014 19:38

اسلام ٹائمز: ملتان میں تربیتی ورکشاپ اور بعدازاں پریس کانفرنس سے خطاب میں ایم ڈبلیو ایم کے سربراہ کا کہنا تھا کہ جس معاشرے میں پانچ سالہ بچے کو بیدردی سے گولیاں ماری جائیں، مستقبل کے معماروں کو ذبح کیا جائے اور معلمہ کو پٹرول چھڑک کر آگ لگائی جائے، یہ اُس ریاست کے حکمرانوں کیلئے ڈوب مرنے کا مقام ہے۔

اسلام ٹائمز۔ مجلس وحدت مسلمین پاکستان کے مرکزی سربراہ علامہ ناصر عباس جعفری نے کہا ہے کہ دہشت گردوں کے خلاف مربوط فوجی اور انٹیلی جنس آپریشن کی ضرورت ہے، حکومت سمیت بعض سیاسی جماعتیں نان ایشوز کو اُٹھا کر قوم کی یکسوئی کو سبوتاژ کر رہی ہیں، مذہبی جماعتیں اپنے اندر موجود تکفیری عناصر سے چھٹکارا حاصل کریں۔ سانحہ پشاور دہشت گردوں کے ساتھ مذاکرات کا طویل ڈرامہ رچانے کا نتیجہ ہے۔ ان خیالات کا اظہار اُنہوں نے ملتان میں صوبے بھر کے عہدیداران کی تین روزہ تربیتی ورکشاپ اور بعدازاں پریس کانفرنس سے خطاب کرتے ہوئے کیا۔ اس موقع پر مجلس وحدت مسلمین شعبہ تربیت کے سربراہ علامہ احمد اقبال رضوی، علامہ اقتدار نقوی، علامہ حسن رضا ہمدانی، علامہ غلام مصطفٰی انصاری، علامہ اصغر عسکری، علامہ عسکری الہدایت، علامہ قاضی نادر حسین علوی، اسد عباس نقوی، محمد عباس صدیقی، سید دلاور عباس زیدی، زاہد حسین مہدوی سمیت دیگر رہنما بھی موجود تھے۔ علامہ ناصر عباس جعفری کا مزید کہنا تھا کہ سانحہ پشاور سفاکیت، بربریت اور ظلم کی انتہا ہے، جس معاشرے میں پانچ سالہ بچے کو بیدردی سے گولیاں ماری جائیں، مستقبل کے معماروں کو ذبح کیا جائے اور معلمہ کو پٹرول چھڑک کر آگ لگائی جائے، یہ اُس ریاست کے حکمرانوں کے لئے ڈوب مرنے کا مقام ہے۔

خبر کا کوڈ: 428793