QR Code

جوڈیشل کمیشن کے فیصلے تک اسمبلیوں میں نہیں جائیںگے، عمران خان

30 Dec 2014 04:44

اسلام ٹائمز: بنی گالہ میں پریس کانفرنس سے خطاب کرتے ہوئے پی ٹی آئی کے چیئرمین کا کہنا تھا کہ باقی سیاسی جماعتوں كی طرح سانحہ پشاور كے بعد ملكی مفاد میں ایک صفحے پر آنے كا فیصلہ كیا، جسکے تحت ہم نے اپنا احتجاج اور دھرنا ختم كردیا تاہم حكومت كے خلاف ہماری تحریک جاری رہیگی۔

اسلام ٹائمز۔ پاکستان تحریک انصاف کے چیئرمین عمران خان نے کہا ہے کہ حکومت انتخابات میں دھاندلی کی تحقیقات کے لئے فوری جوڈیشل کمیشن بنائے اور جب تک کمیشن کسی نتیجے پر نہیں پہنچتا ہم اسمبلیوں میں واپس نہیں آئیں گے۔ جب کہ احتجاج اور دھرنا ختم کرنے کا فیصلہ ملکی مفاد کی خاطر کیا۔ وفاقی دارالحکومت کے علاقے بنی گالہ میں اپنی رہائش گاہ پر پریس کانفرنس کرتے ہوئے عمران خان نے کہا کہ تحریک انصاف نے ساری سیاسی جماعتوں كی طرح سانحہ پشاور كے بعد ملكی مفاد میں ایک صفحے پر آنے كا فیصلہ كیا، جس کے تحت ہم نے اپنا احتجاج اور دھرنا ختم كردیا۔ تاہم حكومت كے خلاف ہماری تحریک جاری رہے گی۔ انہوں نے کہا کہ حکومت انتخابات میں دھاندلی کی تحقیقات کے لئے فوری جوڈیشل کمیشن بنائے اور جب تک کمیشن کسی نتیجے پر نہیں پہنچتا ہم اسمبلیوں میں واپس نہیں آئیں گے۔ انہوں نے کہا ہے کہ ۱۷ جنوری کو دھرنے کے شرکا کی قربانیوں کو خراج تحسین پیش کرنے کے لئے ڈی چوک پر جلسہ منعقد کیا جائے گا۔ انہوں نے کہا کہ ملک میں کینسرکے مریضوں كی بڑھتی ہوئی تعداد كے پیش نظر پشاور اور كراچی میں كینسر اسپتال قائم كرنے كا فیصلہ كیا ہے۔ جب کہ پشاور میں کینسر اسپتال کا بنیادی ڈھانچہ تیار ہوگیا ہے، تاہم عمارت کا کام مکمل کرنے کے مزید رقم درکار ہے۔

خبر کا کوڈ: 429120