جانباز اعتزاز حسن سال 2014ء کیلئے ہیرالڈ کی بہترین شخصیت منتخب

اسلام ٹائمز۔ ہنگو کے اسکول پر خود کش حملے کو ناکام بناتے ہوئے اپنی جان کا نذرانہ دیکر اسکول کے سینکڑوں بچوں کی جان بچانے والے طالبعلم اعتزاز حسن کو سال 2014 کے لیے ’’ہیرالڈ‘‘ کی بہترین شخصیت منتخب کیا گیا ہے۔ گزشتہ سال جنوری میں ہنگو کے علاقہ ابراہیم زئی میں اسکول پر خود کش حملہ کرنے کی کوشش کی گئی، لیکن جانباز اعتزاز حھسن نے حملہ ناکام بنانے کے لیے اپنی جان کی بازی لگا دی۔ ہیرالڈ کی سال کی بہترین شخصیت کا ایوارڈ اس پاکستانی شخصیت کو دیا جاتا ہے جو سال بھر خبروں کی دنیا پر چھائے رہے اور انہوں نے اس سال کوئی اہم کام کیا ہو۔ 16 دسمبر کو پشاور اسکول پر کیے گئے بہیمانہ حملے کے بعد اعتزاز حسن کی قربانی کو مزید سراہا گیا اور وہ تین طرز کے ووٹنگ کے عمل کے فاتح ٹھہرے۔ ووٹنگ کے لیے آن لائن، بذریعہ پوسٹ اور 10 نامور پاکستانیوں پر مشتمل پینل کی رائے کو مدنظر رکھا گیا۔ حتمی نتیجے میں اعتزاز 24.1 فیصد ووٹ لے کر سرفہرست رہے جبکہ چیئرمین تحریک انصاف عمران خان دوسرے نمبر پر رہے۔

عمران خان کو سال 2014 میں ملک کی سب سے بڑی سیاسی تحریک چلانے پر اس فہرست کا حصہ بنایا گیا تھا، مزکورہ فہرست میں شامل دیگر امیدواروں میں توہین مذہب مقدمے کی پیروی کے دوران قتل کیے جانے والے راشد رحمان کے ساتھ اسٹریٹ چائلڈ فٹبال ورلڈ کپ میں تیسرے نمبر پر آنے والے لیاری کے فٹبالر بھی شامل تھے۔ ہیرالڈ کی سال کی بہترین شخصیات کی نامزدگیوں میں ایک اور قابل ذکر نام لاپتہ بلوچ کی واپسی کے لیے مہم چلانے والے ماما قدیر کا ہے جبکہ امن کے نوبیل انعام حاصل کرنے والی ملالہ یوسفزئی بھی امیدواروں میں شامل تھیں۔ دیگر شخصیات میں آرمی چیف جنرل راحیل شریف، ٹی وی کے نامور میزبان حامد میر اور تجربہ کار کرکٹر یونس خان شامل ہیں۔ نوبیل انعام یافتہ اور 2012 میں ہیرالڈ کی بہترین شخصیت کا اعزاز حاصل کرنے والی ملالہ یوسفزئی نے اعتزاز حسن کو خراج تحسین پیش کرتے ہوئے کہا کہ ہمارے ملک میں بہادر لوگوں کی کمی نہیں، اعتزاز حسن کی کہانی ہمت، بہادری اور جرات کی تابندہ مثال ہے۔