QR Code

فرانسیسی جریدے پر حملہ اسلام کی عظیم شخصیات کی توہین کا بدلہ ہے، القاعدہ کا ویڈیو پیغام

14 Jan 2015 19:36

اسلام ٹائمز: غیر ملکی خبر رساں ادارے کی رپورٹ کے مطابق پیرس کی بابرکت جنگ کے نام سے وڈیو میں القاعدہ کے رہنما نصرالانسی کو کہتے سنایا گیا ہے کہ فرانسیسی جریدے چارلی ہیبڈو پر حملہ توہین آمیز خاکوں کا بدلہ ہے، جسے القاعدہ کے مرکزی سربراہ ایمن الظواہری کے حکم پر انجام دیا گیا۔

اسلام ٹائمز۔ معروف تکفیری دہشت گرد تنظیم القاعدہ نے گذشتہ ہفتے توہین آمیز خاکے شائع کرنے والے فرانسیسی جریدے چارلی ہیبڈو پر حملے کی ذمہ داری قبول کر لی ہے۔ غیر ملکی خبر رساں ادارے کی رپورٹ کے مطابق القاعدہ کی جزیرہ نماعرب شاخ کی جانب سے پیرس کی بابرکت جنگ کے حوالے سے ایک پیغام نامی وڈیو جاری کی گئی ہے، وڈیو میں القاعدہ کے رہنما نصرالانسی کو کہتے سنایا گیا ہے کہ فرانسیسی جریدے چارلی ہیبڈو پر حملہ توہین آمیز خاکوں کا بدلہ ہے، جسے القاعدہ کے مرکزی سربراہ ایمن الظواہری کے حکم پر انجام دیا گیا۔ ویڈیو میں نصرالانسی کا کہنا تھا کہ پیرس میں کئے گئے اس حملے کے لئے ہدف کے انتخاب سمیت تمام تر منصوبہ بندی اور مالی معاونت القاعدہ کی جزیرہ نما عرب شاخ نے کی اور ہم نے اس کے لئے جن لوگوں کا انتخاب کیا، انہوں نے بھی ہماری آواز پر لبیک کہا، اس حملے کے ذریعے ہر اس شخص کے لئے کھلا پیغام دے دیا گیا ہے، جو اسلام کی عظیم شخصیات اور تعلیمات کی توہین کرتے ہیں، اگر انہیں اظہار کی آزادی ہے تو ہمارے جوابی اقدام کو بھی قبول کرنا ہو گا۔

دوسری جانب چارلی ہیبڈو ایک مرتبہ پھر آزادی اظہار کے نام پر توہین آمیز خاکوں کا سلسلہ بند کرنے سے باز نہیں آیا ہے، جریدے نے اپنا وہ نیا شمارہ فروخت کے لئے پیش کر دیا ہے جس کے سرورق پر توہین آمیز خاکہ شائع کیا گیا ہے۔ واضح رہے کہ چارلی ہیبڈو نے توہین آمیز خاکے شائع کئے تھے، جس پر گزشتہ ہفتے نامعلوم افراد نے اس کے دفتر پر حملہ کر کے 12 افراد کوہلاک کر دیا تھا، جب کہ پولیس کی کارروائی کے دوران بھی متعدد افراد مارے گئے تھے۔

خبر کا کوڈ: 432519